Actes 18 - Gisir

Pol gu Korinte

¹ Mambu mane neguvyoge, Pol yusuge Atene ayende gu Korinte.

² Vane, abengune ne Sif yanengu re Akilas, aburilu gu musyengi Pon. Mbere akitugu yi Itali ne mugatsi andi Piresile, mbare givunde gi kanangu Kolode avege Sif tsyotsu dinyange digusuge yadi Rom. Pol yende gumbu Akilas ne Piresile.

³ Neve, anegidyanzu gimosi nawu gi gurunge mesambe, atsagene gumbu gi awu gu gudyanze.

⁴ Tsufu tsyotsu tsi gukole, Pol gagwanzi musamu Nyambi gu ndagu ndembu, gu gulisu Sif ne Bireke.

⁵ Ve Silas ne Timote busegile gu Masedwan, Pol sise gidyanzu gi andi gu gusingene kene gwanze musamu Nyambi gigumbi gyotsu. Aganenzi Sif re Sesu re Kirisete mwobutsi wurumu ne Nyambi,

⁶ tumbe Sif besagulusenu ne Pol, bamusyengi. Pol kukumune mekake negu bambile re «Digunurugile, tsyembu tsi enu disakengisi. Sige vave, nigwende gu batu be sandi Sif.»

⁷ Avuduge gu ndagu ndembu, ayende gumbu Tityus Sisetise, mutu walembi Nyambi yi Sif. Agatsageni beli ne ndagu ndembu.

⁸ Kirisepise givunde gi ndagu ndembu, negulu mambu magwambile Pol, asinge Fumu, ne gitsapele gi andi. Mbili batu bemosi batsageni gu Korinte, bulilu Pol, babe ne gitu, bebatisu.

⁹ Dibeti dimosi, Pol abe ne dyeni gu Fumu mwambile re «Wuyadume, tumbe kunde gwambile, wuyavole,

¹⁰ mbare ninagu. Gu sandi mutu wugukuvage dibi. Mbare batu be ami befune gu yadi yine.»

¹¹ Pol tsagene gu Korinte mupume ne girini, anenzange batu musamu Nyambi.

Pol ve wusu ngowu Galyone

¹² Gigumbi gi Galyone abilange ngowu gu Rom yi Akayi, Sif babe ne dugwegu ne Pol. Bemubege ve wusu migage gumbu ngowu.

¹³ Negwambile re «Mutu wuwu agabakigi batu gukalule gigitsitsi gi Nyambi neve arondili mugage.»

¹⁴ Pol mbere ronde gwagule, reve Galyone bambile re «Mbere mutu wuwu atsevage dibi digegi ne dineni, vane mbere nigunulilu, yenu Sif.

¹⁵ Tumbe neve nwasosili gukyelu mbinge, ne mine ne mugage yenu beni, dine, dyanugengisi. Nyabusi gube nzonzi yi mambu memunongu wune!»

¹⁶ Galyone busule ve wusu andi.

¹⁷ Vane, Bireke byotsu bibe vane, begange Soseten, givunde gi ndagu ndembu, bemuruke kube ve wusu mbure yi babile ne Galyone. Tumbe Galyone asedyene re dyambu.

Pol gabuge gu Atyose

¹⁸ Pol akunde tsinge ve Korinte, sige, apasuge ne bane be Nyambi. Akwine mu watange, gu gwende kwange gu Siri, ne Piresile ne Akilas. Arefugu pendi ve gisyeni gi Sankeres, mbare atunge pangeni Nasarite gu gurigitse re pageni yavagu.

¹⁹ Bevuduge gu Efese, ve yandi silile Piresile ne Akilas. Ayende gu ndagu ndembu, ayambilange ne Sif bekekutise.

²⁰ Bemwivule gukunde gube gigumbi nawu, tumbe abuse.

²¹ Negubambile re «Gere Nyambi tsesinge, nigukunde ruge gumbu gi enu.» Vane abesise, ayusuge ve Efese mu watange.

²² Neguduke ve gisyeni gi Sesaré, aregwende gu Serisalem gwebwegise dibundu, sige ayende gu Atyose.

²³ Abe gigumbi ve yadi yine sige ayenegwende. Avyogile gwandi ve Galasi ne Firesi gu gugwarise gitu gi bebingitsi.

Apolose ganenzi gu Efese ne gu Korinte

²⁴ Sif yanengu re Apolose, yi burilu gu yadi yi Lekesanderi, aruge gu Efese. Ayi misambu, ayabange dikengi gisangumu gi Nyambi.

²⁵ Anenzu gubinge nzile Fumu, ne ndure agagwanzi ne gunenze dikengi gukyelu Sesu, tumbe agayabi ke bateme yi Sambatisete.

²⁶ Agagwambili ne gitu gu ndagu ndembu yi Sif. Negumulu, Piresile ne Akilas bemubonge nawu gu gumutsigemise dikengi nzile Nyambi.

²⁷ Vane, neve Apolose aronde gwende gu Akayi, bane be Nyambi bemugaremuse ne gurende gisangumu gu bebingitsi be gyari gine bekemusambegene dikengi. Vane avuduge, ne gyesi gi Nyambi, abe mutu wune musumbu gu batu bene gitu.

²⁸ Mbare ayambilange simusimu ne Sif ve wusu batu, gu gubambile re nu sandi mu bureti, sige arigitsange mu gisangumu gi Nyambi re, Sesu re Kirisete.