Actes 17 - Gisir

Pol ne Silas gu Teselonik

¹ Pol ne Silas bevyogile ve yadi yi Afipolis ne yi Apoloni. Bevuduge gu Teselonik ve ndagu ndembu yi Sif.

² Nevu vagilange ne mbetsi ayingene gu ndagu ndembu. Mu tsufu yireru tsi gukole, ayambilange nawu gukyelu gisangumu gi Nyambi bekekutise.

³ Abelongange ne guberigitse re: «Kirisete gukenge, agurambuge vegari batu bafu. Sesu yi nyanwambili yine, yandi re Kirisete.»

⁴ Bemosi vegari awu babe ne gitu bebinge Pol ne Silas. Mbili batu be sandi Sif balembi Nyambi yi Sif, bende gwandi nawu, re divage gwandi mbili begetu be didume.

⁵ Tumbe Sif tsimosi tsibase ne bungusu. Bebonge nawu bipolu bi batu mu mimbambe, gu guvage kumvu gu bumongu negu yadi. Bende gu ndagu Sesone gwebonge Pol ne Silas gu gubebege vegari bumongu.

⁶ Neve beseberagene, bedute Sesone ne bane be Nyambi bemosi ve wusu bidyeti bi yadi. Ne gwamugange: «Batu babe re bavagi kumvu mwotsu mubavyogili sige baruge gunu!

⁷ Sesone tseberare gumbu gi andi. Batu botsu bane besagobisi migage mi Sesare, bagwambili re guke kanangu nzusu yanengu re Sesu.»

⁸ Mambu mane mevege wome gu bumongu negu bidyeti bi yadi.

⁹ Sesone ne bane be Nyambi besile mbili doli gisuke gu bidyeti, nesi begusisu.

Pol ne Silas gu Bere

¹⁰ Wisi negwide, bane be Nyambi benze Pol ne Silas gu Bere. Neguvuduge gu Bere bingene gu ndagu ndembu yi Sif.

¹¹ Sif tsi Bere tsinegyenze vyagenu netsi Teselonik. Besinge musamu Nyambi ne murime mosi nesi gugagene. Wisi wotsu, batanguni bisangumu bi Nyambi gu gukebe gere mambu mebagwambilu mengenze.

¹² Mbili batu bevagile Sesu gitu, sige, vegari bisi gireke, mbili begetu bene didume ne mbili bebagele bekaluge bane be Nyambi.

¹³ Tumbe Sif tsi Teselonik tsyulu re Pol ganenzi gwandi musamu Nyambi gu Bere, beruge gu yadi yine gutse kokise bumongu nonge gukube kumvu.

¹⁴ Vane ne vane bane be Nyambi benze Pol gu gyari gi nzube, tumbe Silas ne Timote besale ve Bere.

¹⁵ Abebegisange Pol bemubege kwange gu Atene. Vane begabuge gu Bere ne pegi yi Pol, yi gwambile Silas ne Timote re bevuru negumuragene.

Pol gu Atene

¹⁶ Gigumbi gi Pol vingililange Silas ne Timote gu Atene, ayulu firi negulabe re yadi yibase ne mbili nyambi tsi bikokosi.

¹⁷ Gu ndagu ndembu, Pol yambilange ne Sif ne bisi Gereke balembi Nyambi yi Sif bekekutise, negu dikase, wisi wotsu ne batu bavyogi.

¹⁸ Batu bemosi be ne dyele be dibundu di Epikuri ne Setoyisi beruge gwandi gutse gwambile nandi. Bemosi buvulange re «Gye gyagwambili dutolu dune?» Bane re «Mandi agagwanzi nyambi tsyone» lavane Pol ayanzange Sesu ne durambugu du dufu.

¹⁹ Bemubonge nawu, bemubege ve wusu dibundu di batu batabuli misosu, bemwivule re «Dubenze yabe mambu mone mewanenzi?

²⁰ Wadwambili mambu me sandi bigume dwarondi yabe disumu di mambu mane.»

²¹ Re ve bisi Atene ne beni batsageni gune bavyosi gigumbi gi awu ne gwambile ne gulu mambu mone.

²² Vane Pol meteli vegari dibundu dyabetabulili misosu, negwambile re: «Bisi Atene, nyalabi re nwakibi gobise nyambi tsi enu.

²³ Ve nzenangile mimbambe mi yadi enu, ve nzegengilile bikokosi bi enu, nzeragene nesi gitale gi pagu gi rendu re: “Gi nyambi yisayabegenu.” Ayi nwagitsi nesi guyiyabe re yine nyanwambili.

²⁴ Nyambi yi sunde bulongu ne byotsu bimune, yandi re Fumu nzambi ne butambe. Asatsageni gu ndagu tsi rungu ne batu.

²⁵ Asane keri guvegu givave ne mutu. Mbare yandi re gavegi botsu monyu, givefu ne byotsu ne byotsu.

²⁶ Bandile ne mutu mosi, asunde bumongu nonge bekubase mu butambe. Abeligile bigumbi ne ndilu tsi binange bi begutsagenine.

²⁷ Nyambi vagile nane nonge batu bekumukebe. Ve begumukebile, mandi begumusupugile. Lavane, Nyambi satage ne mutu wotsu.

²⁸ Mbare: “Yandi re gaduvegi monyu, ngudu gupupe ne gube monyu.” Are di begulu benu bemosi bambilange: “Yetu gwandi du melale me Nyambi.”

²⁹ Nevu du melale mandi dusabenze pikile re Nyambi ayi munongumosi ne bikokosi byatulu ne myange, ne memani, byakinzu ne duyabu du batu.

³⁰ Tumbe Nyambi sarangi gigumbi gi batu babilange gutsye gibididi, vave aganengi batu botsu mu mbure tsyotsu gu gukalule mutsageninu awu.

³¹ Mbare, atsonzige wisi wu agutabulile bulongu bwotsu bumbanze. Asale mutu mosi gukyelu yine, sige amurambuse gu dufu. Nane Nyambi rigitse mutu wotsu re mutu wuwu nzonzi yi yandi sale.»

³² Ve batu bulu Pol gwambile re Nyambi benze rambuse mutu gu dufu, bemosi bemudoke, bane bambile re «Dugukulilu gwambile dine nyongu nzusu.»

³³ Vane re ve Pol yendile.

³⁴ Tumbe bemosi bene gitu bemubinge. Gube: Denise, mutu watabuli misosu, mugetu wanengu re Damerise ne befimbe gwandi.