Actes 15 - Gisir

Mugageni gu Serisalem gukyelu pure nziye gu batu be sandi Sif

¹ Be batu be Sudé beruge gu Atyose, vane benenze bane be Nyambi re «Nusabenze gobulu pasi re nusatabulu pure nziye neve vagwambili mugage Moyise.»

² Pol ne Barenebase be befurise sige gube mugageni neni gukyelu dyambu dine. Vane bulusenu re Pol, Barenebase ne batu bemosi be Atyose begwende gu Serisalem gwedyambile bilumbi ne bivunde.

³ Dibundu dibevege byotsu gukyelu muvevilu wune. Benange Fenisi ne Samari ne gwenegwambilange nevu batu be sandi Sif besegelugile gu gyari gi Fumu. Musamu wune wuvege mugangu neni gu bane be Nyambi.

⁴ Ve bevudugile gu Serisalem, besangilu ne dibundu, bilumbi ne bivunde, sige bebambile motsu me Nyambi vage nawu.

⁵ Tumbe bemosi be dibundu di Farisi besinge Nyambi, bambile re «Batu be sandi Sif basinge Nyambi nonge betabulu pure nziye ne gubambile gugobise mugage Moyise.»

⁶ Bilumbi ne bivunde bebengune gu gupitse dyambu dine.

⁷ Mugageni negurange vane, Pyere yandi re «Bane be Nyambi nwayabi re Nyambi nzalile vegari enu, veke gigumbi, mu munu ami batu be sandi Sif begulilu musamu boti, nonge bekube ne gitu.

⁸ Nyambi, wayabi mirime mi batu, atsesinge re asangile batu be sandi Sif, negubevege Dinyuni Diboti gere yetu.

⁹ Nyambi sabe ne mbale ne gyari ve yawu ne yetu. Atsegunge mirime mi awu mbare betsibe ne gitu.

¹⁰ Kabe, vave, gye gi nwarondi tumunine Nyambi, ne mbare gu nanguse bane be Nyambi mufune wu nesi yetu beni ne begulu betu duserungule nangule?

¹¹ Dune gitu re dwobulu mu gyesi gi Fumu Sesu, munongu mosi nawu.»

¹² Vane, duvovu gu batu botsu. Sige belimbilile Barenebase ne Pol gwambile ndimbu tsi neni ne bimage bi Nyambi vage nawu gu batu be sandi Sif.

¹³ Ve bemanine gwambile, Sake negubonge: «Bane be Nyambi, nyulilu anu!

¹⁴ Simewu garugi negudwambile neve Nyambi abile ne dibagi digu sale bumongu bu andi vegari batu be sandi Sif.

¹⁵ Ne mambu me bebigitsi, magwetsemini ne dyoni, mbare direndu re

¹⁶ “Gigumbi kwe nigukunde ruge, dyambile Fumu, gutse kunde runge ndagu Davide yi tseberuge, niguyirelige, la nikuyisungige.

¹⁷ Vane, batu benzusu begukebe Fumu, yi, melongu motsu me bumongu bunzenenge bukube bu ami. Labe dyambile Fumu,

¹⁸ yi yabise mambu mane mbetsi.”»

¹⁹ Sake kunde gwambile, «Re dibandu, nyapikili re duyakebe mambu megutsugise batu be sandi Sif betsegeluge gu Nyambi.

²⁰ Tumbe duberendile didi: nuyaye nyame tsi sumuge, tsyasaku pagu gu nyambi tsi bikokosi, tsi swekigu mu mingunge ne tsi melungu, ragemanu ne monyu bulembi.

²¹ Mbare, gigumbi givyoge, batu banze mugage Moyise mu yadi tsyotsu ne gwende tangune mutangu wune mu ndagu tsi ndembu wisi gu kole.»

Gisangumu gi tindu gu batu be sandi Sif besinge Sesu

²² Vane bilumbi, bivunde ne dibundu dyotsu, babe dimosi gu gusale vegari awu batu begurume gu Atyose ne Pol ne Barenebas. Besale Silas ne Sude, yanengu gwandi re Baresebas, batu bebeye bene didume vegari awu.

²³ Bebevege gubege gisangumu: «Yetu bilumbi ne bivunde, bilonge bi enu bi gitu, dwabwegisi bane be Nyambi be sandi Sif batsageni gu Atyose, gu Siri ne gu Silisi.

²⁴ Dutsegulu re nutsibe ne medume ne batu beserugile gu yetu gukyelu mambu me betsenwambile. Dusabevege kepagere dinyange gukyelu yine.

²⁵ Re dibandu dusegulusenu gusale batu begu nuvegitsile. Bekesobe gilonge ne mbatsi tsi etu Pol ne Barenebase

²⁶ betsepage monyu awu gu gidyanzu gi Fumu etu Sesu Kirisete.

²⁷ Dwanurumini Sude ne Silas, begunwambile yawu beni me dutserendi gugu.

²⁸ Mbare, Dinyuni Diboti ne yetu beni dune dibagi di gubuse nuvege bidyaku, vengu ka bibi bine mesumu:

²⁹ nuyaye nyame tsyasaku pagu gu nyambi tsi bikokosi, nuyaye melungu, nuyaye nyame tsyaswekigu mingunge, ragemanu ne monyu bulembi. Nuguvage dikengi pasi re nutsegobise motsu mane. Pembi ne polu gu yenu!»

³⁰ Belagile dibundu, bende gu Atyose, gu begukigile bane be Nyambi bebevege gisangumu.

³¹ Gitangunu, botsu bulu mugangu wu karu yibe gugari.

³² Sude ne Silas, babe yawu beni bebigitsi, betsinge ne gwambile bane be Nyambi gu gubegarmuse ne gubegwarise mu gitu.

³³ Bevyose mwe gigumbi gu Atyose, vane bepasuge nawu gu gugabuge gu batu beberume.

³⁴ [Tumbe Silas ronde sale gu Atyose.]

³⁵ Tumbe Pol ne Barenebase besale gu Atyose. Ne mbili batu bemosi, benenzange ne gwanze musamu Fumu.

Pol ne Barenebase bapasuge

³⁶ Gigumbi kwe Pol ne gwambile Barenebase re «Dugabugi gwelabe bane be Nyambi mu yadi tsyotsu mu dusegwende ne gwanzile musamu Fumu, gu gulabe nevu bavu.»

³⁷ Barenebase mbere ronde bege nawu San yi lugu Marek,

³⁸ tumbe Pol labe re vyage, mbare abesile gu Pafili sige asekude gwende nawu gu gidyanzu gi awu.

³⁹ Mugageni wubebege gu gupasuge. Barenebase bege Marek bebonge bwatu bende gu Sipere.

⁴⁰ Pol sale Silas, bane be Nyambi bemusambule mu gyesi gi Fumu, sige bende.

⁴¹ Avyogile gu Siri ne gu Silisi, ne gwende negwarisange mebundu.