Actes 13 - Gisir

Barenabase ne Sol berumu gu gidyanzu

¹ Gu dibundu di Atyose, gubange bebigitsi ne belonzi, Barenebase, Simewu yi lugu Dupindu, Lusyuse yi Sirene, Manayene, yi bungulu mbure mosi ne Erode Antipase, sige ne Sol.

² Wisi mosi, gigumbi gi belembilange Fumu ne gugwarile nzale, Dinyuni Diboti negubambile re «Nyasale Barenabase ne Sol gu gidyanzu gi nzibenengile, besisyanu bendi.»

³ Vane, negu mane gwarile nzale ne gulembe, bebetsabige mekake, bebesile gwende.

Barenabase ne Sol gu Sipere

⁴ Barenabase ne Sol, negurumu gu gidyanzu ne Dinyuni Diboti, bende gu Selesi ne bwatu gu ningi Sipere.

⁵ Ve bavudugile gu Salemine, banze musamu Nyambi mu ndagu tsi ndembu tsi Sif. San-Marke abe nawu gu gubamuse.

⁶ Benange ningi yotsu kwange Pafose. Vane, bebengune ne ngange yanengu re Bare-Sesu, Sif yi kwevange re mubigitsi.

⁷ Adyanzilange ngowu yi ningi, Seregise Polus wubange mutu lubuge. Ngowu rugise Barenabase ne Sol, mbare arondange gulu musamu Nyambi.

⁸ Ngange yi nengungu gwandi Elimas (re guvage re ngange), abusange re berugi mbare ngowu tsatse vege gitu gu Fumu.

⁹ Vane Sol, yi nengungu gwandi re Pol, yi base ne Dinyuni Diboti, amutsoke gisisu

¹⁰ amwambile re «Wubase ne dyele ne wubi, mwane Sate, wavini mambu motsu meboti! Wusa gukole geluse tondeni tsi Fumu tsi sungeme?

¹¹ Sige yulu, dikake di Fumu dike ve yulu agu wugube ne pafu wusakunde labe giyalele gi dyumbi mwe gigumbi.» Vane ne vane, Elimase abe ne pafu negukebange mutu wugu mubegise.

¹² Ve ngowu labile nane, abe ne gitu, mbare musamu wu yandi yulu gukyelu Fumu wubembe murime andi.

Pol ne Barenabase gu Atyose yi Pisidi

¹³ Pol ne gilonge gi andi bekwine gu bwatu gu Pafose bende gu Peresé, gu Pafili. San-Marek pasuge nawu vane, agabuge gu Serisalem.

¹⁴ Tumbe yawu bebinge nzile awu kwange gu Atyose yi Pisidi. Wisi gukole, bingene gu ndagu ndembu betsagene.

¹⁵ Bisangumu bi mugage Moyise ne bebigitsi, negu manu tangunu, bivunde bi ndagu ndembu bambile Pol ne Barenebase re «Bane be tate, gere nune mwe dyambu digwambile dibundu gu gubegarmuse, nubenze gwambile.»

¹⁶ Pol rambuge, anangule wogu, ne gwambile: «Bisi Iserayel ne yenu nwalembi Nyambi yi Iserayel, nyulilu anu!

¹⁷ Nyambi bumongu bu Iserayel sale begulu betu. Afunise bumongu bune gu babile gu buweni, gu Esipete, sige abevuduse gu bulongu bune ne ndure andi.

¹⁸ Gotsu gu megumi mane mi mipume abesindile gu ginange gyumuge.

¹⁹ Sige, agudise melongu mane gumereru gu bulongu bu Kanan vane avege binange bi awu disale gu bumongu bu andi.

²⁰ Gotsu gu kameyine ne megumi meranu me mipume. Sige vane, avege begulu betu nzonzi kwange gigumbi gi mubigitsi Samyel.

²¹ Vane begulu betu bivule kanangu, Nyambi bevege Sayul, mwane Kise, yi gifumbe gi Besame. Sayule akoke mu megumi mane me mipume.

²² Sayule neguvengigu, Nyambi betsakigile Davide. Ayambile gukyelu andi: “Nya dile Davide, mwane Sesé mutu wu nyarondi, aguvage motsu me nyarondi.”

²³ Dine dilale di Davide dibe Sesu, yi Nyambi byatse gere mwobutsi wu Iserayel nevu avangenine.

²⁴ Nesi Sesu guruge gutse pakile gidyanzu gi andi, Sambatisete ayanze musamu boti gu gunenge bumongu bu Iserayel gu gukalule monyu awu ne gubatisu.

²⁵ Ve disukisilu di gidyanzu gi Sambatisete, ayambile: “Nwapikili re ni nye? Nza Kirisete yi nwavingili. Tumbe yulu anu, agarugi ve nzime ami nzabenze nyangule mikudu mi pondu tsi andi.”

²⁶ Bane be tate, yenu melale me Aberam ne yenu nwalembi Nyambi yi Iserayel, yetu re dutindilu musamu wagwambili nevu agudwobulile.

²⁷ Bisi Serisalem ne bivunde bi awu beseyabe re Sesu re mwobutsi, negulu gwandi mambu me bebigitsi, lavane matangunu myuse myotsu mi gukole. Neguboke Sesu bevage mambu me bebigitsi bambile.

²⁸ Nesi gusabe gigume gi dyambu gi gumubokile, tumbe bivule Pilate gumubokise.

²⁹ Negu mane vage motsu merendu gukyelu andi, bemusakule mu kurusu, bemutsige.

³⁰ Tumbe Nyambi murambuse gu dufu.

³¹ Mu mbili tsufu Sesu labene ne babe nandi bandile gu Galile kwange Serisalem sige beke mbeyi tsi andi ve wusu bumongu bu Iserayel.

³² Yetu beni, dwanwanzile musamu boti wune, wu Nyambi vangenine begulu betu.

³³ Adivage gukyelu etu, melale mawu, negurambuse Sesu gu dufu. Nevu direndilu gu gisangumu gi nimbu girini gi mubeye: “Ndyayu re mwane ami, nemuni, nzikuburise.”

³⁴ Nyambi yambile re agumurambuse vegari batu bafu dunyuru du andi dusakunde bole. Ayambile re “Nigunuvege myule mi ngenze ne mi rereri mi nivangenine Davide.”

³⁵ Re dibandu agakundi tsigemise gu girini ginzusu: “Wusagusile menu, mbatsi agu murime, gubole gu ngili.”

³⁶ Davide, yandi, adyanze gu gigumbi gi andi gidyanzu gi Nyambi, sige ayeragene begulu bandi, dunyuru du andi dubole.

³⁷ Tumbe Sesu sebole gu ngili. Nyambi murambuse gu dufu.

³⁸ Bane be tate yabanu re mu gyesi gi Sesu nwambilu re mabi menu mabunzulu ne bitsimbu bi mugage Moyise serungule nwobule.

³⁹ Mu Sesu, mutu wotsu wune gitu gagobulilu.

⁴⁰ Kabe, nubandekene, mambu merende bebigitsi meyanurugile:

⁴¹ “Gengilanu, yenu nune pedi, sutwanu sige fwanganu! Mbare nigudyanze ve nuvu monyu dyambu di nusagulu pasi re mutu tse nwambile!”»

⁴² Ve Pol ne Barenabase bevudugile gu ndagu ndembu, bebevage re nukukunde ruge wisi nzusu wu gukole gutsi kunde gwambile musamu eni.

⁴³ Gibengunu neguvu, mbili Sif ne batu bekaluge gu gulembe Nyambi yi Iserayel bebinge Pol ne Barenebase. Bebambile ne gubegwarise gube kundi mu gyesi gi Nyambi.

⁴⁴ Wisi wu gukole wuduke, gotsu bumongu bwotsu bu yadi bubengune gutsegulu musamu Fumu.

⁴⁵ Ve Sif belabile bumongu bune, be base ne ngusu, betumise Pol page ne gumusyenge.

⁴⁶ Pol ne Barenabase bebambile ne gitu re «Dibe re yenu, Sif mbere nuregile gwanzilu musamu Nyambi. Tumbe nutse mumage, gotsu nwalabi re nu sandi ne dinyange digube ne monyu peke peke! Re dibandu dugwendile gu batu be sandi Sif.

⁴⁷ Labe ditse dwambile Fumu: “Nzekubyatse gere giyalele gi bumongu bu melongu, nonge nukwende negwanze kwange gu sukile bulongu re Nyambi gagobuli!”»

⁴⁸ Ve batu be sandi Sif bulilu mambu mane, bebase ne mugangu, bedumise Nyambi gukyelu musamu andi. Botsu besalu gu monyu peke peke bevagile Sesu gitu.

⁴⁹ Musamu Fumu wulalegene ne bulongu bwotsu.

⁵⁰ Tumbe mindumbe mi Sif bekokise bidyeti bi yadi ne begetu be sandi Sif bene didume, bagitsi Nyambi Iserayel tumbe be sandi ne gitu gu Fumu Sesu. Bekwane Pol ne Barenebase bebesanze gu ginange gi awu.

⁵¹ Batu babeye bekukumune metambi mawu, bende gu Ikonyume.

⁵² Gu Atyose, bebingitsi besale bebase ne mugangu ne Dinyuni Diboti.