Actes 10 - Gisir

Pyere nengu gumbu Koreneye

¹ Gu Sesaré, gu mutu wanengure Koreneye. Ayi givunde gi gori mu dibundu di Rom dyanengu re «Dibundu di bisi Itali.»

² Ne batu be ndagu andi yotsu, agitsange ne gugobise Nyambi yi Iserayel. Agagwamusi mbili bigayi bi bumongu bu Sif ne gulembe Nyambi yi Iserayel gigumbi gyotsu.

³ Wisi mosi, gyari gi megwere mereru me tsisige, Koreneye kulabe yanze yingene gu mbu gi andi negumwambile re «Koreneye!»

⁴ Agengile yanze ne wome. Yandi re «A gye Fumu?» Yanze negumwagule: «Nyambi masinge ndembu tsi agu ne meboti mewavegi bigaye, asakulibegeni.

⁵ Sige, rume batu gu Safa gu gurugise Simu, yi lugu Pyere.

⁶ Agatsageni gumbu Simu mosi, yadyanzi bikate. Ndagu yandi yi ve mbeke nzube.»

⁷ Yanze yi mwambile ne gwende, Koreneye nenge bedyanzitsi bebeye ne gori andi mosi, yi gobisange Nyambi.

⁸ Abambile motsu mevyoge, sige aberume gu Safa.

⁹ Mbogwali, ve bedyanzitsi ne gori babile mu nzile beli ne yadi yi Safa. Gyari gi digumi di megwere ne megwere mebeye, Pyere pande gu mwanze gilembi gi ndagu gwelembe.

¹⁰ Ayulu nzale mbere ronde guye. Ve bemulambilange biguye, Pyere doru ndosi.

¹¹ Alabe nzambi mwasi ne givave gyasundi, gi gere tsande neni yigangu kodu ne kodu gisunde vetsi.

¹² Gugari, gube bibulu ne munongu: bi byeru bine, byagwendi mugoge ne nyoni tsyotsu.

¹³ Dyufi negumwambile: «Pyere, rambuge, boke, yange!»

¹⁴ Tumbe Pyere yagule: «Vyage, Fumu! Nzame guye biguye bingitsi ne bisumuge!»

¹⁵ Dyufi dikunde mwambile: «Bi Nyambi tsevage re yange wuyapikile re bingitsi!»

¹⁶ Dilabene nyongu yireru, vane gipande gu nzambi.

¹⁷ Pyere pikile negutsyemuge. Negukwegwivule: «Re guvage re tsye dinzilabe?» Gigumbi gine batu berumu ne Koreneye bekebange ndagu yi Simu. Sige beke ve mune ndagu.

¹⁸ Benenge ne gwivule: «Ke Simu-Pyere gatsagenini vave?»

¹⁹ Pyere mbere kyapikili gukyelu ndosi ine, ve Dinyuni Diboti di mwambile re «Yulu, gu batu bereru bakukebi.

²⁰ Rambuge, sunde, yende nawu wuyagagene, mere nziberume.»

²¹ Pyere sunde negubambile re «Ni mutu wu yenu nwakebi. Nutsirugile gye?»

²² Bagule: «Dutserumu ne Koreneye, ayi givunde gi gori. Mutu wu sungeme walembi Nyambi yi Iserayel, Sif tsyotsu tsine tangulu boti nandi. Yanze Nyambi segutse muvege ndongi yiye: “Rugise Pyere gu ndagu wukulu di yandi gukwambile.”»

²³ Vane Pyere bingise gu ndagu gu gilatsi gi mosi. Mbogwali, ayende nawu. Bane be Nyambi be mosi be Safa bende nandi.

²⁴ Wunemosi, avuduge gu Sesaré. Koreneye bevingilange ne biburu byotsu ne mbatsi tsi andi tsi suli.

²⁵ Ve Pyere vudugile Koreneye ruge gutse mubengusene amukutemine gu gumuvege mbulu ne digobe.

²⁶ Tumbe Pyere murambuse negumwambile re «Rambuge, mbare ni mutu ne ndyayu.»

²⁷ Ve ayambilange ne Koreneye, ayingene gu ndagu, gune, aragunu mbili batu.

²⁸ Abambile re «Nwayabi re Sif asa ne dinyange di gunonge ne mweni nesi di gwingene gu ndagu andi. Tumbe Nyambi matigitse gilimbe re niyapikile re gu mutu wu sumuge re nzabenze nonge nandi.

²⁹ Re dibandu, ve nutsenengile, nzagagene. Nyarondi yabe ke dibandu di nutsinengile.»

³⁰ Koreneye ne gwagule: «Guke tsufu yireru, kole megwere mereru me tsisige, nilembange gu ndagu ami. Vane ne vane, nilabe mutu ne bidwaru byavedemi meteli ve wusu ami

³¹ negunyambile: “Koreneye, Nyambi magulu ndembu agu, asalibegene meboti mewavagi bigayi.

³² Rume mutu gu Safa, gu gurugise Simu, yi lugu Pyere. Agatsageni gu mbeke nzube, gu ndagu Simu mosi, ya dyanzi bikate.”

³³ Nirume batu vane ne vane gutsekubonge reve warugile. Sige, duke vave ve wusu Nyambi gu gulu motsu me Fumu tseronde re wudwambili.»

Pyere gagwanzi musamu boti gumbu Koreneye

³⁴ Vane Pyere negwambile: «Sige nyagulu re Nyambi gakoti mutu wotsu.

³⁵ Mutu wotsu gu bulongu wamugobisi ne wusungeme, Nyambi gamurondi.

³⁶ Atinde musamu wune gu bomongu bu Iserayel, musamu boti wu polu ne wu tugu Sesu Kirisete, yi Fumu batu botsu.

³⁷ Nwayabi diregile vyoge gu Galile, duke gu Sudé, ve San magwanzile musamu boti ne gubatise batu.

³⁸ Nwayabi nevu Nyambi salile Sesu yi Nasarete gu gidyanzu gi andi negumuvege ndure yi Dinyuni Diboti. Nwayabi gwandi nevu Sesu nangile bulongu bu Iserayel negwenevagange meboti ne gwenegobule botsu be gutsye dinyange di mbeni, mbare Nyambi abe nandi.

³⁹ Sige yetu, du mbeyi tsi motsu me avage gu bulongu bu Sif ne gu Serisalem. Bemubokise negumugomine ve kurusu.

⁴⁰ Tumbe Nyambi murambuse gu dufu wisi mureru, negumuvege dinyange di gukwerigitse,

⁴¹ sabe gu bumongu bwotsu, tumbe gu yetu be Nyambi sale mbetsi gere mbeyi. Duye ne gunu nandi ve Nyambi mamurambusile gu dufu.

⁴² Aduvege dinyange di gwanze musamu boti gu bumongu ne gwenegwambile re Sesu re wu Nyambi tsesale gu gutabule bumbanze gu batu be monyu ne bafu.

⁴³ Bebigitsi botsu bambile gukyelu andi re mutu wotsu wune gitu agadili gyesi gi gubunzulu mabi mandi mudinyange di dine di andi.»

Batu be sandi Sif bedile Dinyuni Diboti

⁴⁴ Ve Pyere yambililange, Dinyuni Diboti disunde mu botsu bemulilungu.

⁴⁵ Bane be Nyambi be Sif beruge ne Pyere besutu negulabe Dinyuni Diboti di Nyambi vege gusunde gwandi nesi mu batu be sandi Sif.

⁴⁶ Mbare babulu gwambile melongu me nzusu negugitse didume di Nyambi. Pyere yandi re

⁴⁷ «Batu babe badile Dinyuni Diboti gere yetu, dubenze begandise gubatisu?»

⁴⁸ Vane avege dinyange digu bebatise mu dine di Sesu Kirisete. Bemwivule gukunde gube be tsufu nawu.