Actes 1 - Gisir

Dinyuni Diboti divangeninu bilumbi

¹ Tate Tyofile, mu gisangumu gi ami girege nyambile motsu me Sesu pakile vage ne gunenze ve dibandu

² kwange ne wisi wu yandi pande gu nzambi. Ne gumane vege migage, ne Dinyuni Diboti gu bilumbi bi yandi sale.

³ Ne gufu, ne gukunde gabuge monyu, alabene nawu. Aberigitse mbili ndimbu, alabene nawu mu megumi mane me tsufu. Ne gwambilange mambu me bulongu bu Nyambi.

⁴ Wisi wu bayilange mbure mosi abebigise re «Nuyarageme ne Serisalem, tumbe vingilanu di Taye nuvangenine, di ni nunweritse.

⁵ Mbare Sambatisete nubatise mu mambe, tumbe yenu tsufu kwe nugubatisu mu Dinyuni Diboti.»

Sesu pande gu nzambi

⁶ Ve bilumbi bi Sesu babilange mbure mosi nandi be mwivule re «Fumu, gigumbi gine re gi wugusekinzile bulongu bu Iserayel?»

⁷ Abagule re «Sayenu, nubenze yabe gigumbi ne digwere di gurugile mambu mane. Taye ami re ne dinyange di gumevage ne tondeni andi.

⁸ Tumbe Dinyuni Diboti digunusundile ne ndure. Nugube mbeyi tsi ami gu Serisalem, gu Sudé yotsu, gu Samari, kwange ne gusukile bulongu.»

⁹ Negumane gwambile nane, apande gu nzambi, ve begengisilange atsyemuge gutsye dimungi, ve misu mawu.

¹⁰ Ve begengisilange gu yulu, batu bebeye ne bidwaru bi fuge be bevudugile tsutsudu.

¹¹ Bebambile re «Bisi Galile gye gisisu gu yulu? Sesu yine ya pande gu nzambi vegari enu agukunde ruge neve nusemwenine gupande.»

Dibundu di bilumbi

¹² Vane, begabuge gu Serisalem, berambugile gu mukongu wu miri myanengu re Olivi wusabange tage ne Serisalem. Gotsu girini gi digwere di mwendu byeru.

¹³ Ve bevudugile gu Serisalem bepande gu ndagu ndiki gu bebenguninange ne mbetsi. Gube: Pyere, San, Sake ne Anderé, Filip ne Tome, Baretelemi ne Matye, Sake mwane Alefé, Simu yanengu re giyani, ne Suda mwane Sake.

¹⁴ Botsu, di awu dimosi begwarilange gulembe ne begetu, ne Mari nguye Sesu, ne bane be taye be Sesu.

Matyase salu ve givinge gi Suda

¹⁵ Batu basinge Sesu bebengune babe kame ne megumi me beye me batu. Wisi mosi, Pyere ne guretseme vegari awu ne gubambile re

¹⁶ «Bane be Nyambi, adyambile kanangu Davide ne Dinyuni Diboti, mu gisangumu gi Nyambi gukyelu Suda, wube mumbe wusu wu batu begange Sesu. Mbere digulabene.

¹⁷ Ayibe arangu ve dibundu di etu di bilumbi. Yetu botsu dudyanzange mbure mosi mutu ne gi andi gidyaku.

¹⁸ Ne doli tsi yandi sakile Sesu asumbe gyambe, asakumuge muru gutsi, abenzige mukakele, difumu ditubige, bigari byotsu bipanzige.

¹⁹ Dyambu ne guyabegenu gu batu botsu be yadi Serisalem. Gyambe gine gi kulugu gu dilongu di awu re “Akeledam” gyambe gi melungu.

²⁰ Direndu mu gisangumu gi nimbu gukyelu Suda: “Ndagu andi yisilu, yiyatsagene mutu.” Gwandi “Mutu nzusu abongi gidyanzu gi andi.”

²¹ Nonge dusali ve gari etu mutu mosi wube netu

²² pakile ve San mubatisile gu mambe kwange ne wisi wu amapandile gu nzambi ve misu metu. Wugube mbeyi yi durambugilu du dufu du Sesu.»

²³ Bedile bebeye babe ngu ne guvyagene ve gidyanzu gi Suda: wurege Sosefe, wunengungu gwandi re Baresebas kumbu andi Susetise, wu mubeyi Matyase.

²⁴ Yawu botsu belembe re «Fumu, durigitsi, ndyayu re wayabi mirime mi batu, rigitse ndyabeni wu wugusale,

²⁵ gu guvyagesene ve givinge gi Suda mu gidyanzu gi gilumbi gi Sesu gi yandi sile gu gwende gu mbure andi.»

²⁶ Bevage gingane gi gusale mutu vegari awu. Matyase asalu, akundu ve digumi ne wumosi di bilumbi bi Sesu.