1 Timothée 6 - Gisir

¹ Botsu be bevige bebongi fumu tsi awu re batu be digobe dineni. Vane dine di Nyambi ne ginenzitsi gi etu gi sandi gulenzu.

² Bevige bene fumu tsi bane be Nyambi, beyabelenze ne mbare guvage re du bane be taye. Tumbe nonge be bedyanzili vyagunu, mbare fumu tsi badyanzili, bane barondu ne Nyambi. Labe me wugunenze ne me wuguvege.

Gitu gu Nyambi re bukiti bu ngenze

³ Pasi re mutu ganenzi mugulu nzusu, asabinge mambu me ngenze me Fumu etu Sesu Kirisete ne ginenzitsi gyelemine ne bunami,

⁴ abase ne dunangu negubuse yabe. Ane mugangu wubi wu gusose ne gubokene gukyelu ndimi. Re varugili: bungusu, buvale, misyengu, bifigi bibi,

⁵ ne mibokunu misasuki ve gari batu be ne duyabu durekeme, batsyemugilu bureti. Bapikili re bunami duvangu du gube bikiti.

⁶ Ngenze, bunami bukiti buneni, gere wasingeni ke ne bine agu.

⁷ Mbare dusebege givave mu butambe, dusagubege gwandi givave.

⁸ Kabe, pasi re dune biguye ne bidwaru, re votsu.

⁹ Tumbe batu barondi gube bikiti babondugi mu dumangu ne mu dubile gukyelu mbili migangu mi kulegeni, mibi, myaveri batu gu paru ne gubetsyemuse.

¹⁰ Mbare mugangu doli re disine di mabi motsu. Bemosi babe ne mugangu gudenge reve beragemine ne gitu, ne gukwekuvere mu mikengu.

Gubene mutsingu wuboti wu gitu

¹¹ Tumbe ndyayu mutu Nyambi, rine motsu mane! Kebe gusungeme, bunami, gitu, girondu, disinde ne ndembu.

¹² Yubene mutsingu wuboti wu gitu. Gangile monyu peke peke wu wutsenengilu. Wudiyabe wisi wu wusinge gitu ve wusu mbili mbeyi.

¹³ Ve wusu Nyambi, yavegi byotsu monyu, ne ve wusu Sesu Kirisete, avege bumbeyi ve wusu Pos-Pilate, nyakuvegi dinyange re

¹⁴ gobise dikengi mugage wu wutsevegu, wuyapatule kwange wisi wugurugile Fumu Sesu Kirisete.

¹⁵ Dine digube gigumbi gi Nyambi, disine di meboti, Fumu vike, Kanangu yi kanangu tsyotsu, Fumu yi fumu tsyotsu.

¹⁶ Yandi vike re yi peke peke, agatsageni mu giyalele gi saduti mutu beli. Gu sandi mutu wamwene, gu sandi mutu wubenze mwene. Digobe ne ndure bibi nandi peke peke! Dibi nane.

¹⁷ Yambile bikiti bi bulongu re beyabe ne dunangu, beyavere gitu gi awu mu meboti me satsingi, begiveri gu Nyambi, yavegi byotsu ne tondeni nonge dukeyaye.

¹⁸ Bambili guvage meboti, gube bikiti bi mambu meboti. Bevegi ne murime boti ne gugabe ne bembatsi.

¹⁹ Nane begugukigi menive me mipume myarugi sige begubenze denge monyu ngenze.

²⁰ Timote, rare dikengi me wutsevegu. Sile gwambile mambu meseyelemine ne gitu, mambu marigitsi duyabu du gufure.

²¹ Bemosi bevagange re bene duyabu dune reve beragemine ne gitu. Gyesi gi Nyambi gibi nenu!