1 Timothée 5 - Gisir

Ndongi gukyelu bekwili, bivunde bi dibundu ne bevige

¹ Wuyasyembe givunde gi mutu, tumbe mugaremusi gere taye agu. Longe bane begegi gere batu be buru taye mosi,

² bivunde bi begetu gere nguye tsi agu, sige numbe gere ketu tsi agu, ne pikile tsi sungeme.

³ Rare ne digobe bekwili be sandi ne biburu.

⁴ Tumbe gere mukwili ane bane ne kage, nonge beyabi re yawu beni re barari gifumbe gi awu. Nane, begugabusile biburu mboti. Are dyarondi Nyambi.

⁵ Tumbe mukwili wu vike, wu sandi ne mutu wugu murare, atsevere gitu gi andi gu Nyambi, agalembi negugitse Nyambi dibeti ne nyangu.

⁶ Tumbe mukwili wune disube, afu ngenze, nesi agalabeni monyu.

⁷ Berangemisi mambu mane nonge bekole togulu.

⁸ Gere mutu sarari gifumbe gi andi gulu gulu biburu bi andi, amasagule gitu, ayi vyagunu ne mutu wu sandi ne gitu.

⁹ Gu gube mu durangu du bekwili, nonge mugetu abi gu gindande gi megumi me syamenu me mipume. Abi gwandi re asefude mulumi andi.

¹⁰ Nonge adumisu gukyelu meboti me agavagi, gubungule bane be andi dikengi, gusambegene beni, gugunge byeru bi bane be Nyambi, gwamuse bigaye ne guvage meboti ne munongu.

¹¹ Gukyelu bekwili beki numbe, wuyabevere mu durangu. Mbare migangu mi awu myabebegi gu kunde gongene, baligili Fumu nzime.

¹² La beke ne mbele, mbare besagobise pangeni rege yi betunge ne Fumu.

¹³ Gwandi, neve be sandi ne gidyanzu, babongi divume di gwende ndagu ne ndagu. Gwandi la bekene dwadwambile ne gwake bilombi bisabegengili.

¹⁴ Re dibandu nyarondi re bekwili be numbe bekundi gonge, beburi ne gurare ndagu tsi awu. Nane besaguvege baduvini gigumbi gi gudugele.

¹⁵ Mbare bekwili bemosi batsyemugilu dibondu gu gubinge Sate.

¹⁶ Pasi re, gu mwane Nyambi wu mugetu wune bekwili gu gifumbe gi andi, aberari. Vane dibundu digusingene ke ne gurare bekwili be sandi ne batu.

¹⁷ Bivunde byabegisi dibundu dikengi, binonge vegu divane ne digobe, gulu gulu bine bidyaku bineni gwanze ne gunenze.

¹⁸ Mbare direndu re «Wusagukale mubukitsi pinde guye pinde.» Sige, gwandi «Mudyanzitsi nonge vegu divane di andi.»

¹⁹ Wuyasinge givunde gufuregilu dyambu, gotsu ne mbeyi beye, yireru.

²⁰ Pasi re givunde madyanze dibi, musyembi ve piti, nonge bembatsi bekube ne keri.

²¹ Nyakulembigi ve wusu Nyambi, ve wusu Sesu Kirisete ne ve wusu yanze tsi rereri, gobise motsu mane wuyapagise mutu, wuyabe ne mbale ne gyari ne mutu.

²² Wuyavuru negutsabige mutu mekake gu gumuvege gibyatsi gu dibundu. Wuyafwame gu mabi me batu, bange rereri.

²³ Kole gunungu ke mambe, nwangange be melamu gukyelu gifinzi mbare wabelingi.

²⁴ Mabi me batu bemosi malabeni nesi begusosisu. Tumbe gumbu bemosi, ke gere gigumbi gyavyoge.

²⁵ Mambu meboti gwandi malabeni, nesi mesalabeni vane ne vane mesagu benze gube mesweme.