1 Timothée 3 - Gisir

Belonzi be dibundu

¹ Labe musamu genze: «pasi re mutu garondi gube mulonzi gu dibundu, agarondi gidyanzu giboti.»

² Nonge mulonzi dibundu ayabe ne togu, ayafude mugatsi andi, abi mutu wusavavisi, wu digobe, wu gyenze, wu nyange nenze.

³ Ayabe gidyongi, giyani, tumbe mutu sigeme wu sandi ne mugangu doli.

⁴ Ayabi begise tsapele andi bane be andi babi ne digobe dineni.

⁵ Gere mutu sayabi begise tsapele andi, agubegisile dibundu di Nyambi tsye?

⁶ Ayabe mutu warugili negusinge Nyambi, mbare gubase ne dunangu ne gulogu neve logu Mbeni.

⁷ Nonge batu be sandi mu dibundu bemugobisi gwandi, akole lenzu ne gubonduge mu mirambu mi Mbeni.

Bedyanzitsi be dibundu

⁸ Munongu mosi, bedyanzitsi gwandi babi batu be digobe, be sandi ne ndimi beye. Beyavavise gunu melamu ne gidengitsi gibi gi doli.

⁹ Benonge rare ne pikile tsi rereri mambu me Nyambi duyabise.

¹⁰ Nonge gu re bemange mirime, vane pasi re du sandi betogulu ne dyambu, begube bedyanzitsi.

¹¹ Bedyanzitsi be begetu munongu, beyatogulu, beyagele, beyavavise, babi kundi mu mambu motsu.

¹² Nonge bedyanzitsi beyafude begatsi be awu, berari bane ne bitsapele bi awu dikengi.

¹³ Mbare badyanzi dikengi badengi dinyange diboti, ne gitu gineni mu dyonge ne Sesu Kirisete.

Duyabu dwavegu ne gitu

¹⁴ Nyakurendili gisangumu gigi ne gitu re mepape nyakwene.

¹⁵ Tumbe gere nzavure neguruge, wuguyabe mu gisangumu gigi neve wugutsagenine gu ndagu Nyambi, re guvage re dibundu di Nyambi monyu, yi girwalu ne gisiku gi bureti.

¹⁶ Yi, dwadyambili ve piti: me meneni mambu me duyabise Nyambi! Kirisete Akwerigitse ne duyuru, ayabegenu re asungeme ne Dinyuni Diboti, alabene ne yanze. Ayenzu tsangu mu melongu motsu, avagilu gitu mu butambe, adumisu bundumbe gu nzambi!