1 Timothée 1 - Gisir

Gubwegise

¹ Menu, Pol, gilumbi gi Sesu Kirisete, ne dinyange di Nyambi mwobutsi etu ne Sesu Kirisete gitu gi etu.

² Nyakubwegisi Timote, mwane ami suli mu gitu. Tate Nyambi ne Sesu Kirisete Fumu etu bekuvegi gyesi, gigebe ne polu!

Gubigise gukyelu bukulu bubi

³ Neve nikwambilile ve nyendilange gu Masedwan, bange gu Efese. Gu batu gu yadi yine banenzi bukulu bunzusu, begandisi re beyakunde divage!

⁴ Bambili re besili bilombi bi gufure ne mune bukulu! Mane mabegi ke mitsonzige, mi sandi ne musumbu, ke digudyanzile Nyambi yi dwayabi ne gitu.

⁵ Dibandu di mubigisu wuwu gu gutsandule girondu, girondu gyarugili gu murime rereri, pikile tsi boti ne gitu gi ngenze.

⁶ Bemosi besetsyemugilu dibondu, ne gusingene ne bilombi bi sandi ne musumbu.

⁷ Bakwebongi ve mbure birange gukyelu mugage Nyambi, tumbe besagulu me bagwambili, nesi bilombi bi batsigemisi ne mune gitu.

⁸ Dwayabi re mugage wu wuboti, pasi re dwayabi disumu.

⁹ Durangemini anu re mugage wuserendilu batu besungeme, tumbe gukyelu batu bene pendule, be sandi dumi Nyambi ne bidyanze mabi. Mugage wu rendilu batu besagobisi Nyambi ne bisyemu bi andi byotsu, gukyelu bikuye ne botsu baboki taye ne nguye.

¹⁰ Mugage wu batu babingi monyu bumbesi, wu bebagele bagwendi dyonge ne bebagele nawu, ne miyugu mi bevige. Mugage gwandi wu befutsi, bavagi milevu mi gufure ne botsu badyanzi mambu mese sungeme ne ginenzitsi giboti.

¹¹ Labe dyetsemine ne musamu wuboti nivegu, warugili gu Nyambi, yi denge didume, disine di meboti.

Gisingu gu Nyambi

¹² Nyagabusili Sesu Kirisete Fumu etu diboti, mbare atsepagile gitu gi gumbonge gu gidyanzu gi andi, atsepege ngudu yi guvage gidyanzu gi ami.

¹³ Lavane nyambilange mabi gukyelu andi ve rege, nimukwanange ne gusyengange. Tumbe Nyambi rigitse gigebe gi andi gukyelu ami, mbare nzeyabange di nivagange, nzemuvagilange gitu.

¹⁴ Fumu etu lundise gyesi gi andi mu menu ne gitu ne girondu byarugili gu dyonge ne Sesu Kirisete.

¹⁵ Labe musamu ngenze, wu nyange singe mutu wotsu re «Sesu Kirisete ruge mu bulongu guse gobule bevagitsi be mabi.» Ni mebeni tindi muvagitsi mabi ve gari botsu.

¹⁶ Tumbe dibandu re dine Nyambi rigitsile gigebe gi andi gukyelu ami. Aronde re Sesu Kirisete rigitsi mu menu, ni tindi muvagitsi mabi, givingitsi gi andi gyotsu. Nonge nikube gibagunu gi botsu mugese, beguvere gitu gu yandi ne begudenge monyu peke peke.

¹⁷ Gu kanangu yi peke peke, yisegafu, yisalabeni ne Nyambi vike, abi didume ne dugitsu mwendu ne mwendu! Dibi nane.

Bandekene gitu

¹⁸ Timote, mwane ami, nyakuvegi ndongi yiye, yetsemine ne mambu me bebigitsi bambile gukyelu agu. Mambu mane, mabi ngudu agu mu mutsingu boti wu ndyayu wugubene.

¹⁹ Rare gitu ne pikile yi boti. Bemosi bebuse binge pikile tsi awu vane gitu gi awu gidomine.

²⁰ Ve gari awu vabe Imene ne Lekesandere, nibesake gu Sate nonge bekuyabe re bayakunde syengise Nyambi.