Zaburi 94 - BIBLIA Maandiko Matakatifu Kwa Watu Wote 2002

Mungu mwamuzi wa wote

¹ Ee Yawe, Mungu mwenye kulipiza kisasi, ewe Mungu mwenye kulipiza kisasi, ujitokeze!

² Usimame, ee mwamuzi wa watu wote; uwaazibu wenye kiburi inavyowastahili!

³ Waovu wataona utukufu mpaka wakati gani? Watajisifia mpaka wakati gani, ee Yawe?

⁴ Mpaka wakati gani waovu watajigamba kwa maneno? Watajivuna na kujitapa mpaka wakati gani?

⁵ Wanaangamiza watu wako, ee Yawe, wanawagandamiza hao wanaokuwa mali yako.

⁶ Wanaua wajane na wageni; wanachinja wayatima.

⁷ Wanasema: “Yawe haoni, Mungu wa Yakobo hajui.”

⁸ Enyi wajinga wa mwisho, mufikiri kidogo! Enyi wapumbafu, mutapata akili wakati gani?

⁹ Aliyefanya sikio, yeye hawezi kusikia? Aliyeumba jicho, yeye hawezi kuona?

¹⁰ Mwenye kuonya mataifa, yeye hawezi kuazibu? Mwenye kufundisha wanadamu, yeye hana akili?

¹¹ Yawe anajua mawazo ya watu; anajua kwamba hayafai kitu.

¹² Heri mutu unayemwadibisha, ee Yawe, mutu unayefundisha sheria yako,

¹³ kusudi siku ya taabu apate utulivu, mpaka waovu wachimbiwe shimo.

¹⁴ Yawe hatawaachilia watu wake; hatawatupa hao wanaokuwa mali yake.

¹⁵ Maana hukumu zitatolewa kwa haki tena, na wote wenye moyo wa usawa watazifuata.

¹⁶ Nani aliyenisaidia kumupinga mutu mwovu? Nani aliyekuwa upande wangu juu ya wabaya?

¹⁷ Yawe asingalinisaidia, ningalikwisha kwenda kwenye inchi ya wafu.

¹⁸ Nilipotambua kwamba ninateleza, wema wako, ee Yawe, ulinikingia.

¹⁹ Mahangaiko ya moyo wangu yanapozidi, wewe unanifariji na kunifurahisha.

²⁰ Wewe hauwezi kushirikiana na waamuzi wapotovu, wanaotunga masharti za kutetea maovu.

²¹ Wao wanapatana kuwaangamiza watu wa haki, na kuwahukumu watu wasiokuwa na kosa wauawe.

²² Lakini Yawe ni kimbilio langu; Mungu wangu ni kikingio changu.

²³ Atawarudishia uovu wao wenyewe, atawateketeza kwa sababu ya ubaya wao. Yawe, Mungu wetu, atawateketeza kabisa!