Zaburi 92 - BIBLIA Maandiko Matakatifu Kwa Watu Wote 2002

Wimbo wa kumusifu Mungu

¹ Zaburi. Wimbo wa Siku ya Sabato.

² Ni vizuri kukushukuru, ee Yawe, kuliimbia jina lako sifa, ee Mungu Mukubwa.

³ Ni vizuri kutangaza wema wako asubui, na uaminifu wako kwa wakati wa usiku,

⁴ kwa muziki wa zeze na kinubi, kwa sauti tamu ya zeze.

⁵ Ee Yawe, matendo yako makubwa yananifurahisha; nitashangilia kwa sababu ya mambo yote uliyotenda.

⁶ Matendo yako, ee Yawe, ni makubwa sana! Mawazo yako hayatambulikani!

⁷ Mutu mupumbafu hawezi kufahamu, wala mujinga hajui jambo hili:

⁸ kwamba waovu wanaweza kustawi kama majani, watenda maovu wote wanaweza kufanikiwa, lakini mwisho wao ni kuangamia milele.

⁹ Lakini wewe, ee Yawe, ni mukubwa kwa milele.

¹⁰ Hao waadui zako, ee Yawe, hao waadui zako, hakika wataangamia; wote wanaotenda maovu, watatawanyika!

¹¹ Wewe umenipa nguvu kama mbogo; umenimimia mafuta kwa kunifurahia.

¹² Kwa macho yangu, nimeona waadui zangu wameshindwa; kwa masikio yangu, nimesikia kilio cha wanaotenda maovu.

¹³ Watu wa haki wanastawi kama mingazi; wanakomaa kama mierezi ya Lebanoni!

¹⁴ Kama miti iliyopandwa katika nyumba ya Yawe, wanastawi katika viwanja vya Mungu wetu;

¹⁵ inaendelea kuzaa matunda hata katika uzee; siku zote wamejaa utomvu na wabichi,

¹⁶ wapate kutangaza kwamba Yawe ni wa usawa. Yeye ni kikingio changu. Kwake hakuna upotovu.