Zaburi 90 - BIBLIA Maandiko Matakatifu Kwa Watu Wote 2002

SEHEMU YA INE (Zaburi 90–106 ) Mungu wa milele na mwanadamu

¹ Maombi ya Musa, mutu wa Mungu. Ee Bwana, tangia vizazi vyote, wewe umekuwa usalama wetu.

² Mbele milima haijakuwa, mbele haujauumba ulimwengu, wewe ndiwe Mungu, milele na milele.

³ Unawarudisha watu katika mavumbi walimotoka, ukisema: “Wanadamu, murudi!”

⁴ Kwako miaka elfu moja ni kama siku moja tu, ni kama jana ambayo imekwisha pita, ni kama makesha ya usiku mumoja.

⁵ Unatowesha mbali watu kama ndoto! Wanadamu ni kama majani yanayochipuka asubui:

⁶ asubui yanachipuka na kuchanua, magaribi yamekwisha nyauka na kukauka.

⁷ Hasira yako inatuangamiza; tunatishwa na kasirani yako.

⁸ Maovu yetu umeyaweka mbele yako; zambi zetu za siri ziko wazi mbele yako.

⁹ Kwa hasira yako maisha yetu yanatoweka, yanaisha kama pumzi.

¹⁰ Muda wa maisha yetu ni miaka makumi saba, au tukikuwa wenye afya, miaka makumi nane; lakini yote ni shida na taabu! Siku zinapita mbio, nasi tunatoweka!

¹¹ Nani anayetambua uzito wa hasira yako? Nani anayeona matokeo ya kasirani yako?

¹² Utufundishe ufupi wa maisha yetu kusudi tuweze kuwa na hekima.

¹³ Ee Yawe, urudie! Utakasirika mpaka wakati gani? Utuonee huruma sisi watumishi wako.

¹⁴ Utushibishe wema wako kila asubui, tupate kushangilia na kufurahi maisha yetu yote.

¹⁵ Utujalie sasa miaka mingi ya furaha, kama ulivyotupa miaka mingi ya shida na taabu.

¹⁶ Utuonyeshe matendo yako sisi watumishi wako; uwaonyeshe wazao wetu utukufu wako.

¹⁷ Utuonyeshe uzuri wako, ee Bwana, Mungu wetu; uimarishe kazi zetu, uziimarishe.