Zaburi 9 - BIBLIA Maandiko Matakatifu Kwa Watu Wote 2002

Shukrani kwa Mungu

¹ Kwa mukubwa wa waimbaji. Kwa mutindo wa wimbo “Kilio cha mwana.”

² Nitakushukuru wewe Mungu kwa moyo wangu wote; nitayaeleza matendo yako yote ya ajabu.

³ Nitafurahi na kushangilia kwa ajili yako; nitaliimbia sifa jina lako, ewe Mungu Mukubwa.

⁴ Waadui zangu walirudi nyuma, walijikwaa na kuangamia mbele yako.

⁵ Umeitetea haki yangu katika maneno yangu; umeikaa katika kiti chako cha kifalme, wewe mwamuzi wa haki.

⁶ Umeyakaripia mataifa, umewaangamiza waovu; umeyafuta majina yao kwa milele.

⁷ Waadui wameangamia milele; umeiongoa miji yao, ukumbusho wao umetoweka.

⁸ Lakini Yawe anatawala milele; ameweka kiti chake cha kifalme, apate kuhukumu.

⁹ Anauhukumu ulimwengu kwa haki; anayaamua mataifa kama vile inavyofaa.

¹⁰ Yawe ni kikingio cha watu wanaoonewa; yeye ni kikingio katika nyakati za taabu.

¹¹ Wanaojua jina lako, wanakutegemea, kwa maana wewe, ee Yawe, hauwatupi wanaokutafuta.

¹² Mumwimbie sifa Yawe anayekaa Sayuni! Muyatangazie mataifa mambo aliyotenda!

¹³ Mungu analipiza kisasi cha damu iliyomwangwa; wala hasahau hata kidogo kilio cha wenye kuonewa.

¹⁴ Ee Yawe, wewe unayeniopoa kutoka nguvu za kifo, uangalie mateso wale wanaonichukia wanayoniletea na kunirehemu

¹⁵ kusudi nitangaze sifa zako mbele ya watu wa Sayuni, nipate kushangilia kwa sababu umeniokoa.

¹⁶ Mataifa yameanguka katika shimo walilochimba, miguu yao imenaswa kwenye wavu waliotega.

¹⁷ Yawe amejitambulisha; anatoa hukumu. Waovu wamenaswa kwa matendo yao wenyewe.

¹⁸ Waovu wataishia katika kuzimu; ndiyo mataifa yote yanayomusahau Mungu.

¹⁹ Lakini wakosefu hawatasahauliwa siku zote; tumaini la wamasikini halitapotea milele.

²⁰ Ee Yawe, simama sasa mwanadamu asishinde! Uyakusanye sasa hivi mataifa mbele yako, uyahukumu.

²¹ Uyatie hofu, ee Yawe, watu wa mataifa watambue kwamba wao ni watu tu!