Zaburi 89 - BIBLIA Maandiko Matakatifu Kwa Watu Wote 2002

Wakati wa taabu ya kitaifa

¹ Mashairi ya Etani, Mwezra.

² Ee Yawe, nitayaimba mema yako kwa milele; nitatangaza uaminifu wako kwa vizazi vyote.

³ Nitasema kwamba wema wako unadumu kwa milele, uaminifu wako ni imara kama mbingu.

⁴ Wewe umesema: “Nimefanya agano na muchaguliwa wangu, nimemwapia mutumishi wangu Daudi hivi:

⁵ ‘Siku zote nitamuweka mumoja wa wazao wako kuwa mufalme, tena nitaudumisha ufalme wako milele.’ ”

⁶ Ee Yawe, mbingu zinasifia maajabu yako, uaminifu wako unasifiwa katika kusanyiko la watakatifu.

⁷ Nani katika mbingu anayeweza kulinganishwa nawe, ee Yawe? Nani anayekuwa sawa nawe kati ya miungu?

⁸ Wewe unatisha katika baraza la watakatifu; wote wanaokusanyika mbele yako wanakuheshimu na kukuogopa.

⁹ Ee Yawe, Mungu wa majeshi, ni nani mwenye nguvu kama wewe? Ee Yawe, uaminifu umekuzunguka pande zote.

¹⁰ Wewe unaamuru machafuko ya bahari; mawimbi yake yakiinuka, unayatuliza.

¹¹ Ulimuponda nyama mukubwa Rahaba na kumwua; uliwatawanya waadui zako kwa nguvu yako.

¹² Mbingu ni zako na dunia ni yako pia; ni wewe uliyeumba ulimwengu na vyote vinavyokuwa ndani yake.

¹³ Wewe uliumba kaskazini na kusini; milima Tabori na Hermoni inakushangilia.

¹⁴ Mukono wako unajaa nguvu, mukono wako una nguvu na umeshinda!

¹⁵ Haki na sheria ndio musingi wa utawala wako; wema na uaminifu vinakutangulia!

¹⁶ Heri watu wanaojua kukushangilia, wanaoishi katika mwangaza wa wema wako, ee Yawe.

¹⁷ Wanafurahi muchana kutwa kwa sababu yako, na kukusifu kwa ajili ya haki yako.

¹⁸ Wewe ndiwe utukufu na nguvu yao; kwa upendo wako tunapata ushindi.

¹⁹ Ee Yawe, ngao yetu ni chini ya ulinzi wako. Mufalme wetu ametoka kwako, ewe Mutakatifu wa Israeli.

Ahadi ya Mungu kwa Daudi

²⁰ Zamani ulisema katika maono, ukawaambia watumishi wako waaminifu: “Nimemupa nguvu shujaa mumoja, nimemwinua huyo niliyemuchagua kati ya watu.

²¹ Nimemupata mutumishi wangu Daudi; nimemuchagua kwa kumupakaa mafuta yangu matakatifu.

²² Mukono wangu wa nguvu utakuwa naye siku zote; mukono wangu mimi mwenyewe utamwimarisha.

²³ Waadui hawataweza kumushinda, wala waovu hawatamwonea.

²⁴ Mimi nitawaponda wapinzani wake; nitawaangamiza wote wanaomuchukia.

²⁵ Nitakuwa mwaminifu na mwema kwake. Kwa jina langu atapata ushindi mukubwa.

²⁶ Nitaongeza nguvu na utawala wake, kutoka bahari ya Mediteranea mpaka muto Furati.

²⁷ Yeye atasema, ‘Wewe ni baba yangu, Mungu wangu, mulima wa wokovu wangu.’

²⁸ Nami nitamufanya kuwa muzaliwa wangu wa kwanza, mukubwa kuliko wafalme wote wa dunia.

²⁹ Nitamwonyesha wema wangu kwa milele, na agano langu kwake litadumu siku zote.

³⁰ Nitaudumisha ukoo wake wa kifalme siku zote, nao ufalme wake kama mbingu.

³¹ “Lakini wazao wake wakiiacha sheria yangu, wasipoishi kufuatana na maagizo yangu,

³² kama wakivunja masharti yangu, na kuacha kutii amri zangu,

³³ hapo nitayaazibu makosa yao; nitawapiga kwa sababu ya maovu yao.

³⁴ Lakini sitaacha kumutendea mema Daudi, wala sitavunja uaminifu wangu kwake.

³⁵ Sitavunja agano langu naye, wala kugeuza neno nililosema kwa mudomo wangu.

³⁶ “Nimeapa mara moja tu kwa utakatifu wangu; nami sitamwambia Daudi uongo.

³⁷ Ukoo wake utadumu milele, nao ufalme wake kama jua.

³⁸ Utadumu milele kama mwezi unaokuwa mushuhuda mwaminifu asiyetoka katika anga.”

Masikitiko ya sasa

³⁹ Lakini sasa, ee Mungu, umemutupa na kumukataa, umejaa kasirani juu ya huyo uliyemuchagua.

⁴⁰ Umefuta agano ulilofanya na mutumishi wako; umeitupa taji yake ya kifalme ndani ya mavumbi.

⁴¹ Umebomoa kuta zote za muji wake; umezivunjavunja nafasi zake za kukimbilia.

⁴² Wote wanaopita wanaiba mali zake; wajirani zake wanamuzarau.

⁴³ Umewapatia waadui ushindi; umewafurahisha waadui zake wote.

⁴⁴ Umepoteza ukali wa silaha zake; ukamwachilia ashindwe katika vita.

⁴⁵ Umemuvua madaraka yake ya kifalme, ukauangusha utawala wake chini.

⁴⁶ Umezipunguza siku za ujana wake, ukamufunika haya tele.

Kuomba usalama

⁴⁷ Ee Yawe, utajificha hata milele? Mpaka wakati gani hasira yako itawaka kama moto?

⁴⁸ Unikumbuke, ee Bwana. Maisha ni mafupi! Umewaumba wanadamu wote kwa bure?

⁴⁹ Ni mutu gani anayeweza kuishi pasipo kufa? Nani anayeweza kujiepusha na kifo?

⁵⁰ Ee Bwana, yako wapi yale mema yako ya zamani uliyomwahidi Daudi kwa uaminifu wako?

⁵¹ Ee Bwana, ukumbuke matusi ya mutumishi wako, jinsi ninavyovumilia mazarau ya mataifa.

⁵² Ee Yawe, ona jinsi wanavyomuzomea muchaguliwa wako. Wanamuzomea kila fasi anapokwenda.

⁵³ Yawe asifiwe milele! Amina! Amina!