Zaburi 86 - BIBLIA Maandiko Matakatifu Kwa Watu Wote 2002

Kuomba musaada

¹ Maombi ya Daudi. Unitegee sikio, ee Yawe, unijibu, maana mimi ni masikini na mukosefu.

² Ulinde maisha yangu maana mimi ni mwaminifu mbele yako; uniokoe mimi mutumishi wako ninayekutegemea.

³ Wewe ni Mungu wangu; basi, unionee huruma, maana ninakulilia muchana kutwa.

⁴ Ee Bwana wetu, ninakutolea moyo wangu. Ufurahishe roho yangu mimi mutumishi wako.

⁵ Ee Bwana, wewe ni muzuri na mwenye kusamehe, mwingi wa wema kwa wote wanaokuomba.

⁶ Ee Yawe, utegee maombi yangu sikio; usikilize kilio cha ombi langu.

⁷ Siku za taabu ninakuita, maana wewe unaniitikia.

⁸ Ee Bwana, hakuna mungu mwingine anayekuwa kama wewe; hakuna anayeweza kufanya unayofanya wewe.

⁹ Mataifa yote uliyoumba, yatakuja kukuabudu, ee Bwana; yatatangaza ukubwa wa jina lako.

¹⁰ Wewe ndiwe mukubwa, unafanya maajabu; wewe peke yako ndiwe Mungu.

¹¹ Unifundishe njia yako, ee Yawe, nipate kuwa mwaminifu kwako; uongoze moyo wangu nikuheshimu.

¹² Ee Bwana, Mungu wangu, nitakusifu kwa moyo wote; nitatangaza ukubwa wa jina lako milele.

¹³ Wema wako kwangu ni mwingi sana! Umeniokoa kutoka katika kuzimu.

¹⁴ Ee Mungu, watu wenye kiburi wamenishambulia; kundi la watu wakali lilitaka kuniua, wala halikujali wewe hata kidogo.

¹⁵ Lakini wewe, Bwana, ni Mungu wa rehema na huruma; wewe ni muvumilivu, mwingi wa wema na uaminifu.

¹⁶ Unigeukie, unihurumie; unijalie nguvu yako mimi mutumishi wako, umwokoe mutoto wa mujakazi wako.

¹⁷ Unionyeshe kitambulisho cha wema wako, ee Yawe, kusudi wale wanaonichukia wafezeheke, wanapoona umenisaidia na kunifariji.