Zaburi 81 - BIBLIA Maandiko Matakatifu Kwa Watu Wote 2002

Wimbo wa sikukuu

¹ Kwa mukubwa wa waimbaji: kwa mutindo wa watu wa Gati. Zaburi ya Asafu.

² Mumwimbie Mungu kwa sauti, maana ni nguvu yetu, mumushangilie Mungu wa Yakobo,

³ muvumishe wimbo wa shangwe, mupige ngoma, mucheze zeze na kinubi cha sauti nzuri.

⁴ Mupige baragumu kutangaza mwandamo wa mwezi, na pia mbalamwezi wakati wa sikukuu yetu.

⁵ Hilo ndilo sharti katika Israeli; hilo ndilo agizo la Mungu wa Yakobo.

⁶ Aliwapa watu wa Israeli agizo hilo, aliposhambulia inchi ya Misri. Ninasikia sauti nisiyoitambua ikisema:

⁷ “Mimi nilikutua mizigo yako toka kwenye mabega, nilikuondolea matofali uliyochukua katika mikono.

⁸ Katika shida uliniita, nami nikakuokoa. Nilikujibu kutokea katika ngurumo. Nilikujaribu kwenye maji ya Meriba.

⁹ Enyi watu wangu, musikie onyo langu. Heri ungenisikiliza, ee Israeli!

¹⁰ Usikuwe na mungu wa kigeni; usiabudu hata kidogo mungu mwingine.

¹¹ Mimi ni Yawe, Mungu wako, niliyekutoa katika inchi ya Misri. Fungua kinywa chako, nami nitakulisha.

¹² “Lakini watu wangu hawakunisikiliza; Israeli hakunitaka kabisa.

¹³ Hivyo, nikawaacha wabaki katika ugumu; wafuate mashauri yao wenyewe.

¹⁴ Heri watu wangu wangenisikiliza! Heri Israeli angefuata njia zangu!

¹⁵ Ningewashinda waadui zao haraka; ningenyoosha mukono juu ya wapinzani wao.

¹⁶ Wanaonichukia wangenipigia magoti kwa hofu, na azabu yao ingekuwa ya milele.

¹⁷ Lakini wewe ningekulisha kwa ngano bora, ningekushibisha kwa asali ya pori.”