Zaburi 80 - BIBLIA Maandiko Matakatifu Kwa Watu Wote 2002

Maombi kwa ajili ya taifa

¹ Kwa mukubwa wa waimbaji. Kwa mutindo wa wimbo. Zaburi ya Asafu.

² Unitegee sikio, ewe Muchungaji wa Israeli, unayewaongoza wazao wa Yosefu kama kondoo. Ewe unayekaa juu ya makerubi, uangaze,

³ mbele ya kabila la Efuraimu, la Benjamina na la Manase. Uonyeshe nguvu yako, ukuje kutuokoa!

⁴ Utengeneze tena maisha yetu, ee Mungu; utuangalie kwa wema, nasi tutaokoka.

⁵ Ee Yawe, Mungu wa majeshi, mpaka wakati gani utakasirikia maombi ya watu wako?

⁶ Umefanya huzuni ikuwe chakula chetu; umetukunywesha machozi kwa wingi.

⁷ Umetufanya jambo la mazarau kwa jirani zetu; waadui zetu wanatuchekelea.

⁸ Ee Mungu wa majeshi, utengeneze tena maisha yetu, utuangalie kwa wema, nasi tutaokoka.

⁹ Uliongoa muzabibu kutoka Misri; ukawafukuza watu wa mataifa, na kuupandikiza katika inchi yao.

¹⁰ Uliupalilia upate kukomaa, nao ukatoa mizizi na kuenea katika inchi yote.

¹¹ Uliifunika milima kwa kivuli chake, na matawi yake yakakuwa kama mierezi mikubwa.

¹² Matawi yake yalienea mpaka kwa bahari; navyo vichipukizi vyake mpaka kando ya muto Furati.

¹³ Mbona ulibomoa kuta zilizouzunguka? Sasa kila anayepita anachuma zabibu zake;

¹⁴ nguruwe wa mwitu wanauharibu, na wanyama wa pori wanautafuna!

¹⁵ Utugeukie tena, ee Mungu wa majeshi. Uangalie toka mbinguni, uone; uutunze muzabibu huu.

¹⁶ Ulinde kijiti ulichokipanda kwa mukono wako; hicho kichipukizi ulichokomalisha wewe mwenyewe.

¹⁷ Watu walikikata na kukiteketeza, uwaangalie kwa ukali, waangamie.

¹⁸ Mukono wako umukinge huyo uliyemurehemu; huyo uliyemuchagua kwa ajili yako.

¹⁹ Hatutakuacha tena; utujalie uzima, nasi tutakusifu.

²⁰ Ee Yawe, Mungu wa majeshi, utengeneze tena maisha yetu; utuangalie kwa wema, nasi tutaokoka.