Zaburi 79 - BIBLIA Maandiko Matakatifu Kwa Watu Wote 2002

Maombi kwa ajili ya hasara la taifa

¹ Zaburi ya Asafu. Ee Mungu, watu wasiokujua wameshambulia inchi yako. Wamechafua hekalu lako takatifu, wameugeuza Yerusalema kuwa mabomoko.

² Wameacha maiti za watumishi wako zikuliwe na ndege, wametoa miili ya watu wako kwa wanyama wa pori.

³ Damu yao imemwangwa kama maji katika Yerusalema, wamelazwa humo, wala hakuna wa kuwazika.

⁴ Tunazarauliwa na mataifa jirani, jirani zetu wanatuchekelea na kutusimanga.

⁵ Ee Yawe, utakasirika hata milele? Hasira yako itawaka kama moto hata wakati gani?

⁶ Uyamwangie mataifa yasiyokujua hasira yako, ndizo, tawala zote zisizoheshimu jina lako.

⁷ Maana wamemeza wazao wa Yakobo, wameteketeza kabisa makao ya taifa lako.

⁸ Usituazibu kwa sababu ya makosa ya babu zetu. Huruma yako itufikie haraka, maana tumegandamizwa sana!

⁹ Utusaidie, ee Mungu, mwokozi wetu kwa utukufu wa jina lako. Utuokoe na kutusamehe zambi zetu, kwa ajili ya jina lako.

¹⁰ Kwa nini mataifa yatuambie: “Mungu wenu yuko wapi?” Utujalie tuone jinsi utakavyowalipiza mataifa kisasi kwa ajili ya mauaji ya watumishi wako.

¹¹ Kilio cha hao wafungwa kikufikie; kwa nguvu yako kubwa uwaokoe waliohukumiwa kufa.

¹² Ee Bwana, uwalipize mataifa jirani mara saba kwa ajili ya matusi waliyokutukana.

¹³ Nasi watu wako, sisi kondoo wa kundi lako, tutakushukuru milele, na kukusifu nyakati zote.