Zaburi 77 - BIBLIA Maandiko Matakatifu Kwa Watu Wote 2002

Maombi ya kufarijiwa wakati wa shida

¹ Kwa mukubwa wa waimbaji: kwa mutindo wa Yedutuni. Zaburi ya Asafu.

² Ninamulilia Mungu kwa sauti. Kwa sauti ninamulilia Mungu, anisikie.

³ Wakati wa taabu ninamutafuta Bwana wetu; ninamunyooshea mikono yangu usiku bila kuchoka, lakini sifarijiwi na mutu yeyote.

⁴ Ninafikiri juu ya Mungu na kuugua; ninamukumbuka na kufa moyo.

⁵ Unanizuiza hata kupata usingizi, ninahangaika hata siwezi kusema.

⁶ Ninafikiri juu ya siku za zamani; ninakumbuka miaka ya hapo kale.

⁷ Usiku ninawazawaza; moyo wangu unafikiri, nayo roho yangu inajiuliza:

⁸ “Bwana ametuachilia kabisa? Hatapendezwa tena nasi?

⁹ Wema wake umekwisha kabisa? Hatatimiza tena ahadi zake?

¹⁰ Mungu amesahau kuwa na huruma? Hasira yake imeondoa rehema yake?”

¹¹ Kisha nikasema: “Kinachoniumiza zaidi ni kwamba Mungu Mukubwa hatendi tena kitu kwa ajili yetu!”

¹² Nitayakumbuka matendo yako, ee Yawe, nitafikiri juu ya maajabu yako ya hapo kale.

¹³ Ninafikiri juu ya kazi zako, ninawaza juu ya matendo yako makubwa.

¹⁴ Kila unachofanya, ee Mungu, ni kitakatifu. Ni mungu gani anayekuwa mukubwa kama Mungu wetu?

¹⁵ Wewe ni Mungu unayetenda maajabu; wewe umeyaonyesha mataifa uwezo wako.

¹⁶ Kwa mukono wako wa kuume uliwakomboa watu wako; uliwakomboa wazao wa Yakobo na Yosefu.

¹⁷ Maji yalipokuona, ee Mungu, maji yalipokuona, yaliogopa sana; bahari ilitetemeka mpaka chini.

¹⁸ Mawingu yalinyesha mvua nyingi, ngurumo zikavuma katika anga, mishale ya umeme ikaangaza kila upande.

¹⁹ Kishindo cha ngurumo yako kilitokea katika zoruba, umeme wako ukaangaza ulimwengu, dunia ikatikisika na kutetemeka.

²⁰ Wewe ukajifanyia njia juu ya bahari; ulitembea juu ya maji yale mengi, lakini pahali ulipopita hapakuonekana.

²¹ Uliwaongoza watu wako kama kondoo, chini ya uongozi wa Musa na Haruni.