Zaburi 75 - BIBLIA Maandiko Matakatifu Kwa Watu Wote 2002

Mungu ni mwamuzi wa haki

¹ Kwa mukubwa wa waimbaji: kwa mutindo wa wimbo “Usiharibu”. Zaburi ya Asafu: wimbo.

² Tunakushukuru, ee Mungu, tunakushukuru! Tunatangaza ukubwa wa jina lako na kueleza matendo yako makubwa.

³ Mungu anasema: “Mimi nimeweka wakati kamili! Wakati huo nitahukumu kwa haki.

⁴ Inchi ikitetemeka na vyote vinavyokuwa ndani yake, mimi ndiye ninayeimarisha misingi yake.

⁵ Ninawaambia wenye kiburi: ‘Mwache kiburi’, na waovu: ‘Musiote mapembe!

⁶ Musijione kuwa watu wa maana sana, wala kusema maneno ya majivuno.’ ”

⁷ Ukubwa hautoki mashariki au magaribi, wala hautoki katika jangwa au kwa milima.

⁸ Mungu mwenyewe ndiye mwamuzi; anamushusha mumoja na kumwinua mwingine.

⁹ Yawe anashika kikombe katika mukono, kimejaa divai kali ya hasira yake. Anaimimia, nao waovu wote wanaikunywa; wanaikunywa mpaka tone la mwisho.

¹⁰ Lakini mimi nitafurahi milele, nitamwimbia Mungu wa Yakobo sifa.

¹¹ Atavunja mapembe yote ya watu waovu; lakini ataotesha mapembe ya watu wa haki.