Zaburi 74 - BIBLIA Maandiko Matakatifu Kwa Watu Wote 2002

Maombolezo

¹ Mashairi ya Asafu. Kwa nini, ee Mungu, umetutupilia kabisa? Mbona hasira yako inawaka juu ya kondoo wako?

² Kumbuka taifa lako ulilojipatia tangia zamani, kabila ulilokomboa likuwe mali yako. Kumbuka mulima Sayuni pahali unapokaa.

³ Pita juu ya mabomoko haya ya tangu zamani! Waadui wameharibu kila kitu katika hekalu.

⁴ Waadui zako wamepiga kelele la ushindi katika hekalu lako! Wamesimika humo bendera zao za ushindi!

⁵ Wanafanana na mukataji wa kuni, anayekata miti kwa shoka lake.

⁶ Walivunjavunja michoro ya hekalu, kwa mashoka na nyundo zao.

⁷ Waliunguza pahali patakatifu pako; walikufuru pahali pale unapoheshimiwa.

⁸ Walikusudia kutuangamiza wote pamoja; walichoma pahali pote katika inchi ambapo tulikutana kwa kukuabudu.

⁹ Hatuoni tena vitambulisho vya kuwa kwako kati yetu, hatuna tena nabii yeyote, wala hakuna anayejua mwisho wa haya yote!

¹⁰ Ee Mungu, mpaka wakati gani adui atakuchekelea? Watakufuru jina lako milele?

¹¹ Mbona umeficha mukono wako wa kuume? Kwa nini haunyooshi mukono na kuwapiga?

¹² Hata hivyo wewe Mungu ni mufalme wetu tangu zamani; umefanya mambo makubwa ya kuokoa katika inchi.

¹³ Kwa uwezo wako mukubwa uligawanya bahari; uliponda vichwa vya nyama mukubwa wa bahari.

¹⁴ Wewe uliponda vichwa vya nyama mukubwa Leviatani; ukawapa wanyama wa jangwa muzoga wake.

¹⁵ Wewe umefanya chemichemi na vijito; na kukausha mito mikubwa.

¹⁶ Muchana ni wako na usiku ni wako; umeweka mwezi na jua kwenye nafasi zao.

¹⁷ Wewe umeweka mipaka yote ya dunia; umepanga wakati wa kipwa na wakati wa mvua.

¹⁸ Kumbuka, ee Yawe, mazarau ya waadui zako; taifa pumbafu linatukana jina lako.

¹⁹ Usitutupie, sisi njiwa wako, kwa wanyama wakali, usisahau kwa siku zote maisha ya wamasikini wako.

²⁰ Ukumbuke agano ulilofanya nasi! Inchi imejaa mateso makali kila nafasi za giza.

²¹ Usiwaache wanaogandamizwa wafezeheshwe, uwajalie wamasikini na wakosefu wasifu jina lako.

²² Ee Mungu, simama sasa ujitetee! Ukumbuke mazarau ya kila siku ya wasiokujua.

²³ Usisahau makelele ya waadui zako; na fujo ya siku zote ya wapinzani wako.