Zaburi 7 - BIBLIA Maandiko Matakatifu Kwa Watu Wote 2002

Maombi ya mutu anayeteswa

¹ Kwa mukubwa wa waimbaji. Wimbo wa malalamiko ya Daudi, aliomwimbia Yawe kwa ajili ya Kushi wa kabila la Benjamina.

² Ee Yawe, Mungu wangu, ninakukimbilia wewe. Uniokoe kutoka wote wanaonitesa, uniponyeshe.

³ Kama si vile, watakuja kunirarua kama simba, kunipasua vipandevipande wala hakuna wa kuniokoa.

⁴ Ee Yawe, Mungu wangu! Kama nimetenda moja ya mambo haya: kama nimechafua mikono yangu kwa ubaya,

⁵ kama nimemurudishia rafiki yangu mabaya pahali pa mema, au nimemunyanganya adui yangu bila sababu,

⁶ basi, adui anifuatilie na kunikamata, akomeshe maisha yangu na kuuzika uzima wangu ndani ya mavumbi.

⁷ Ee Yawe, kwa hasira yako, simama sasa ukomeshe kasirani ya waadui zangu! Amuka, ee Mungu wangu, wewe umeamuru haki ifanyike.

⁸ Ukusanye mataifa kandokando yako, nawe uyatawale tokea kule juu.

⁹ Wewe, ee Yawe, unayehukumu mataifa, unihukumu kadiri ya haki yangu, kulingana na ukamilifu wangu.

¹⁰ Ukomeshe uovu wa watu wabaya, uwaimarishe watu wa haki, ee Mungu unayetenda haki, unayejua siri za mioyo na mafikiri ya watu.

¹¹ Mungu ndiye ngao yangu; yeye anawaokoa watu wenye moyo wa usawa.

¹² Mungu ni mwamuzi wa haki; kila siku analaumu maovu.

¹³ Watu wasipogeuka toka ubaya wao, Mungu atanoa upanga wake; atavuta upinde wake na kupima shabaha.

¹⁴ Atatayarisha silaha zake za hatari, na kuitia mishale yake moto.

¹⁵ Mutu mubaya anatunga uovu, anajaa uharibifu na kuzaa udanganyifu.

¹⁶ Anachimba shimo, na kulirefusha, kisha anatumbukia humo yeye mwenyewe.

¹⁷ Uharibifu wake utamurudilia yeye mwenyewe; ukali wake utamwangukia yeye mwenyewe.

¹⁸ Nitamushukuru Yawe kwa sababu ya haki yake; nitaimba sifa za jina la Yawe, Mungu Mukubwa.