Zaburi 65 - BIBLIA Maandiko Matakatifu Kwa Watu Wote 2002

Wimbo wa shukrani

¹ Kwa mukubwa wa waimbaji. Zaburi. Wimbo wa Daudi.

² Ee Mungu, unastahili sifa huko Sayuni. Watu wanapaswa kukutimizia viapo vyao,

³ maana wewe unajibu maombi yetu. Wanadamu wote watakuja kwako wewe peke.

⁴ Tunapolemewa na makosa yetu, wewe mwenyewe unatusamehe.

⁵ Heri wale unaowachagua na kuwaleta karibu, waishi katika kiwanja chako. Sisi tutatoshelewa na mazuri ya nyumba yako, mazuri ya hekalu lako takatifu.

⁶ Kwa matendo yako makubwa unatuitikia na kutuokoa, ewe Mungu mwokozi wetu. Wewe ndiwe tumaini la viumbe vyote katika dunia yote na mbali katika bahari.

⁷ Kwa nguvu yako uliisimika milima pahali pake. Wewe una nguvu nyingi!

⁸ Unatuliza uvumi wa bahari na wa mawimbi yake, unakomesha fujo za watu.

⁹ Wakaaji wa miisho ya dunia wanashangazwa na vitambulisho vyako. Unasababisha furaha kila pahali, tokea mashariki hata magaribi.

¹⁰ Wewe unatunza udongo kwa kuunyeshea mvua, unaujalia mboleo na kuustawisha; muto wako umejaa maji tele, unaifanikisha inchi na kuipatia mavuno. Hivi ndivyo unavyotayarisha udongo.

¹¹ Unanyeshea mashamba mvua kwa wingi, na kuyalowanisha kwa maji; unalainisha udongo kwa manyunyu, na kubariki mimea ichipuke.

¹² Unakamilisha mwaka kwa kutupatia mazao mazuri; kila nafasi ulipopita kumejaa utajiri.

¹³ Mbuga za majani zimejaa mifugo, milima nayo imejaa furaha.

¹⁴ Mashamba ya kulishia nyama yamejaa kondoo, mabonde yamefunikwa na ngano. Kila kitu kinashangilia kwa furaha.