Zaburi 57 - BIBLIA Maandiko Matakatifu Kwa Watu Wote 2002

Kuomba musaada

¹ Kwa mukubwa wa waimbaji. Kwa mutindo wa wimbo “Usiharibu.” Mashairi ya Daudi alipomuponyoka Saulo na kujificha katika pango.

² Unihurumie, ee Mungu, unihurumie, maana ninakukimbilia wewe. Ninakimbilia kwenye kivuli cha mabawa yako, mpaka zoruba ya maangamizi ipite.

³ Ninamulilia Mungu Mukubwa, Mungu anayenikamilishia nia yake.

⁴ Atanipelekea musaada toka mbinguni na kuniokoa, atawafezehesha hao wanaonishambulia. Mungu atanionyesha wema na uaminifu wake!

⁵ Mimi nimezungukwa na waadui, wenye uchu wa damu kama simba; meno yao ni kama mikuki na mishale, ndimi zao ni kama panga kali.

⁶ Utukuzwe, ee Mungu, juu katika mbingu! Utukufu wako uenee katika dunia yote!

⁷ Waadui wamenitegea wavu waninase, nami ninaugua kwa huzuni. Wamenichimbia shimo katika njia yangu, lakini wao wenyewe wametumbukia humo.

⁸ Moyo wangu ni tayari, ee Mungu, moyo wangu ni tayari; nitaimba na kukushangilia!

⁹ Amuka, ee nafsi yangu! Muamuke, enyi kinubi na zeze! Nitayaamusha mapambazuko!

¹⁰ Ee Bwana, nitakushukuru kati ya watu; nitakuimbia sifa kati ya mataifa.

¹¹ Wema wako unaenea hata juu katika mbingu, uaminifu wako unafika hata katika mawingu.

¹² Utukuzwe, ee Mungu, juu katika mbingu! Utukufu wako uenee katika dunia yote!