Zaburi 51 - BIBLIA Maandiko Matakatifu Kwa Watu Wote 2002

Kuomba usamehe

^1-2 Kwa mukubwa wa waimbaji. Zaburi ya Daudi inayoelekea wakati nabii Natani alipomufikia kwa kumwonya juu ya uzinzi alioufanya na Batiseba.

³ Unihurumie, ee Mungu, kadiri ya wema wako; uyafute makosa yangu, kadiri ya wingi wa rehema yako.

⁴ Unisafishe kabisa kosa langu; unitakase zambi yangu.

⁵ Ninaitikia kabisa makosa yangu, siku zote ninaona waziwazi zambi yangu.

⁶ Nimekukosea wewe peke yako, nimetenda mabaya mbele yako. Hivi uamuzi wako ni wa haki, hukumu yako haipotoki.

⁷ Mimi ni mukosaji tangia kuzaliwa kwangu, mwenye zambi tangia tumbo la mama yangu.

⁸ Wewe unataka moyo wa ukweli; hivyo unifundishe kuwa na moyo wa hekima.

⁹ Unitakase kwa hisopo, nikuwe safi, unisafishe, nikuwe mweupe pee.

¹⁰ Unijaze furaha na shangwe, unifurahishe tena, mimi ambaye uliniponda.

¹¹ Ugeuke, usiangalie zambi zangu; uyafute makosa yangu yote.

¹² Ee Mungu, uniumbie moyo safi, uweke ndani yangu roho mupya na inayoimarika.

¹³ Usinitupe mbali nawe; usiondoe roho yako takatifu ndani yangu.

¹⁴ Unirudishie furaha ya wokovu wako, uniimarishe kwa Roho wako mwema.

¹⁵ Halafu nitawafundisha wakosaji njia zako, nao wenye zambi watarudi kwako.

¹⁶ Uniokoe kutoka kosa la kumwanga damu, ee Mungu, Mungu mwokozi wangu, nami nitaimba kwa sauti kwamba umeniokoa.

¹⁷ Ee Bwana, uniwezeshe kusema, midomo yangu itangaze sifa zako.

¹⁸ Kweli wewe haupendezwi na sadaka. Hautaki nikutolee sadaka za kuteketezwa.

¹⁹ Sadaka ninayokutolea, ee Mungu, ni roho munyenyekevu. Haukatai moyo munyenyekevu na wa kutubu.

²⁰ Ee Mungu, upendezwe na kuutendea mazuri Sayuni; uzijenge tena upya kuta za Yerusalema.

²¹ Halafu utapendezwa na sadaka za haki: ndizo sadaka za kuteketezwa na za kuteketezwa nzima. Ngombe dume watatolewa juu ya mazabahu yako.