Zaburi 49 - BIBLIA Maandiko Matakatifu Kwa Watu Wote 2002

Upumbafu wa kutegemea mali

¹ Kwa mukubwa wa waimbaji. Zaburi ya Wakora.

² Musikie jambo hili, enyi watu wote! Mutege masikio, enyi wakaaji wote wa dunia.

³ Musikilize wote, wakubwa na wadogo, enyi watajiri na wakosefu.

⁴ Maneno yangu ni mazitomazito; mawazo yangu ni ya hekima.

⁵ Ninatega sikio, nisikilize mezali, ninafafanua kitendawili kwa muziki wa zeze.

⁶ Kwa nini niogope wakati wa hatari, wakati ninapozungukwa na uovu wa waadui?

⁷ Watu waovu wanategemea mali zao, wanajisifia wingi wa utajiri wao.

⁸ Lakini mwanadamu hawezi hata kidogo kujikomboa mwenyewe; hawezi kumulipa Mungu bei ya maisha yake,

⁹ maana malipo ya ukombozi wa maisha ni kubwa sana. Hawezi kutoa kitu chochote kinachotosha,

¹⁰ kimwezeshe aendelee kuishi siku zote, bila kuona kaburi.

¹¹ Inaonekana wazi kuwa hata wenye hekima wanakufa, nao wapumbafu na wajinga vilevile. Wote wanawaachia wengine mali zao.

¹² Ingawa walisema kwamba udongo ni wao, lakini ni makaburi ndiyo nyumba zao hata milele, ni makao yao vizazi hata vizazi.

¹³ Mwanadamu hadumu katika utajiri wake; anakufa tu kama nyama.

¹⁴ Hayo ndiyo yanayowapata wanaojitumainia kwa upumbafu, ndio mwisho wa wale wanaojivunia mali zao.

¹⁵ Wanaongozwa kama kondoo mpaka katika kuzimu; kifo ndiye muchungaji wao. Wanashuka moja kwa moja katika kaburi. Miili yao inaozea huko. Kuzimu inakuwa makao yao.

¹⁶ Lakini Mungu atanikomboa kutoka katika kuzimu, ataniopoa kutoka huko.

¹⁷ Usihangaike ukiona mutu anatajirika, wala mali yake ikiongezeka zaidi na zaidi.

¹⁸ Maana atakapokufa hatachukua kitu chochote, mali yake haitashuka huko chini pamoja naye.

¹⁹ Hata akijitukuza katika maisha haya, na kusifiwa kwa sababu ya kufanikiwa,

²⁰ atakwenda kukutana na babu zake waliomutangulia kufa, ambao hawawezi kuona tena mwangaza.

²¹ Mwanadamu hadumu katika utajiri wake: anakufa tu kama nyama.