Zaburi 45 - BIBLIA Maandiko Matakatifu Kwa Watu Wote 2002

Mashairi ya kumusifu mufalme

¹ Kwa mukubwa wa waimbaji. Kwa mutindo wa wimbo: “Mayungiyungi.” Mashairi ya Wakora. Wimbo wa mapenzi.

² Moyo wangu umejaa mawazo mazuri: ninamutungia mufalme mashairi yangu, ulimi wangu ni kama kalamu ya mwandishi hodari.

³ Wewe ni muzuri kuliko wanadamu wote, maneno yako ni rehema tupu, Mungu amekubariki milele.

⁴ Ujifungie upanga wako, ewe shujaa! Wewe ni mutukufu na mwenye mamlaka.

⁵ Songa mbele kwa utukufu upate ushindi, utetee ukweli na kulinda haki. Mukono wako utende mambo makubwa.

⁶ Mishale yako ni mikali, inapenya mioyo ya waadui za mufalme; nayo mataifa yanaanguka chini yako.

⁷ Kiti chako cha kifalme ni imara, kinadumu milele kama cha Mungu. Wewe unatawala watu wako kwa haki.

⁸ Unapenda haki na kuchukia uovu. Kwa hiyo Mungu, Mungu wako, amekupendelea kuliko wenzako; amekuweka kuwa mufalme kwa kukupakaa mafuta ya kufurahisha.

⁹ Nguo zako zinanuka marasi, udi, na mudalasini; muziki wa vinubi unakufurahisha katika nyumba ya pembe za tembo.

¹⁰ Wabinti za wafalme ni kati ya wanaokupokea, naye malkia amesimama kwa kuume kwako, amevaa mapambo ya zahabu safi kabisa ya Ofiri.

¹¹ Sikiliza binti, ufikiri! Tega sikio lako: sahau sasa taifa lako na jamaa yako.

¹² Uzuri wako unavuta moyo wa mufalme; yeye ni bwana yako, lazima umutii.

¹³ Watu wa Tiro watakuletea zawadi; watajiri watajipendekeza kwako.

¹⁴ Binti wa mufalme anaingia, naye ni muzuri kabisa! Nguo yake imefumwa na nyuzi za zahabu.

¹⁵ Akiwa amevaa nguo za rangi nyingi, anaongozwa kwa mufalme, akisindikizwa na wabinti wenzake.

¹⁶ Kwa furaha na shangwe wanafika huko, na kuingia katika nyumba ya mufalme.

¹⁷ Ee mufalme, utapata watoto wengi watakaotawala pahali pa babu zako; utawafanya watawale katika dunia yote.

¹⁸ Nitalifanya jina lako litukuzwe katika vizazi vyote, nayo mataifa yatakusifu milele.