Zaburi 40 - BIBLIA Maandiko Matakatifu Kwa Watu Wote 2002

Mashairi ya sifa

¹ Kwa mukubwa wa waimbaji. Zaburi ya Daudi.

² Nilimungojea Yawe kwa uvumilivu, akanielekea na kusikia kilio changu.

³ Aliniondoa katika shimo la hatari, alinitoa katika matope mengi, akanisimamisha salama juu ya mulima, na kuziimarisha hatua zangu.

⁴ Alinifundisha wimbo mupya, wimbo wa sifa kwa Mungu wetu. Wengi wataona, wataogopa, na kisha watamutumainia Yawe.

⁵ Heri mutu anayemutumainia Yawe, mutu asiyejiunga na watu wenye majivuno, watu waliopotoka kwa kuabudu miungu ya uongo.

⁶ Ee Yawe, Mungu wangu, umetufanyia maajabu mengi, na mipango yako juu yetu haihesabiki; hakuna yeyote anayekuwa kama wewe. Kama ningeweza kusimulia hayo yote, hesabu yake ingenishinda.

⁷ Wewe hautaki sadaka za kuteketezwa kwa moto wala matoleo, sadaka za nyama za kuteketezwa wala za kusamehewa zambi, lakini umenipa masikio nikusikie.

⁸ Halafu nikasema: “Ninakuja. Katika kitabu imeandikwa juu yangu.

⁹ Ninataka kutimiza mapenzi yako, ee Mungu wangu; sheria yako ninaishika kwa moyo wangu wote!”

¹⁰ Nimesimulia habari njema ya ukombozi, mbele ya kusanyiko kubwa la watu. Kama unavyojua, ee Yawe, mimi sikujizuia kuitangaza.

¹¹ Sikuficha katika moyo wangu ukombozi ulionijalia. Nimetangaza siku zote kwamba wewe ni mwokozi mwaminifu. Sikuficha kusanyiko kubwa la watu wema wako na uaminifu wako.

Kuomba musaada

¹² Ee Yawe, usikose kunirehemu! Wema na uaminifu wako vinilinde.

¹³ Hatari zisizohesabika zinanizunguka, maovu yangu yananisonga hata siwezi kuona; ni mengi kuliko nywele zangu, nami nimevunjika moyo.

¹⁴ Upendezwe, ee Yawe, kuniokoa; ee Yawe, ukuje haraka kunisaidia.

¹⁵ Wote wanaokusudia kuniangamiza, wafezeheke pamoja! Hao wanaotamani niumie, warudi nyuma na kuzarauliwa!

¹⁶ Hao wanaonisimanga, wafezeheke kwa kushindwa kwao!

¹⁷ Lakini wanaokutafuta wafurahi na kushangilia. Wanaopenda uwaokoe waseme siku zote: “Yawe ni mukubwa!”

¹⁸ Mimi ni masikini na mukosefu, ee Bwana; lakini wewe haukunisahau. Wewe ni musaada wangu na mwokozi wangu; ukuje, ee Mungu wangu, usikawie!