Zaburi 39 - BIBLIA Maandiko Matakatifu Kwa Watu Wote 2002

Mwanadamu mbele ya Mungu

¹ Kwa mukubwa wa waimbaji. Kwa mutindo wa Yedutuni. Zaburi ya Daudi.

² Nilisema: “Nitayachunga maisha yangu, kusudi nisitende zambi kwa usemi wangu. Nitafunga midomo yangu waovu wanapokuwa karibu nami.”

³ Nilikuwa kama bubu, bila kusema kitu, nilinyamaza lakini sikupata faida. Mateso yangu yalizidi kuwa makali,

⁴ mahangaiko yangu yakaniunguza katika moyo. Kadiri nilivyowaza ndivyo nilivyotaabika, kisha maneno haya yakanitoka:

⁵ “Ee Yawe, unijulishe mwisho wangu, siku zangu za kuishi zimenibakia ngapi, nijue namna maisha yangu yanavyopita upesi!”

⁶ Kumbe umenipimia maisha mafupi sana! Maisha yangu si kitu mbele yako. Hakika, kila mwanadamu ni kama pumzi tu!

⁷ Kweli, kila mutu anapita kama kivuli; masumbuko yake yote ni bure tu; anakusanya mali, hajui atakayeipata!

⁸ Na sasa, ee Bwana, ninatazamia nini? Tumaini langu ni kwako wewe!

⁹ Uniokoe katika makosa yangu yote; usikubali wapumbafu wanichekelee.

¹⁰ Niko kama bubu, sisemi kitu, kwa maana wewe ndiwe uliyetenda hayo.

¹¹ Usiniazibu tena; ninamalizika kwa mapigo yako.

¹² Unapomwazibu mutu zambi zake kwa kumwadibisha, unaharibu kama nondo kile anachokipenda. Hakika, kila mwanadamu ni kama pumzi tu!

¹³ Usikie maombi yangu, ee Yawe, usikilize kilio changu, usikae kimya ninapolia. Maana, mimi ni kama mugeni tu anayepita, ni musafiri kama vile babu zangu wote walivyokuwa.

¹⁴ Uache kuniangalia nipate kufurahi kidogo, mbele sijaaga dunia na kutoweka kabisa.