Zaburi 35 - BIBLIA Maandiko Matakatifu Kwa Watu Wote 2002

Kuomba musaada

¹ Zaburi ya Daudi. Uwapinge, ee Yawe, hao wanaonipinga; uwashambulie hao wanaonishambulia.

² Utwae ngao yako na kikingio chako, uinuke ukuje kunisaidia!

³ Chukua mukuki na upanga wako kwa kuwazuia wale wanaonifuata. Uniambie mimi kwamba utaniokoa.

⁴ Wapate haya na kuzarauliwa, hao wanaotaka kupoteza maisha yangu! Warudishwe nyuma na kufezeheka, hao wanaonitafutia hasara.

⁵ Wakuwe kama maganda yanayopeperushwa na upepo, wakikimbizwa na malaika wa Yawe!

⁶ Njia yao ikuwe ya giza na utelezi, wakifukuzwa na malaika wa Yawe!

⁷ Maana walinitegea mitego bila sababu; walinichimbia shimo bila neno lolote.

⁸ Maangamizi yawapate wao kwa rafla, wanaswe katika mutego wao wenyewe, watumbukie katika shimo lao wenyewe!

⁹ Hivi nitamufurahia Yawe; nitashangilia kwa sababu yeye ameniokoa.

¹⁰ Nitamwambia Yawe kwa moyo wangu wote: “Wewe, ee Yawe, hakuna anayekuwa kama wewe! Wewe unawaokoa wamasikini kutoka makucha ya wenye nguvu, wamasikini na wakosefu kutoka mikono ya wanyanganyi.”

¹¹ Washuhuda wakorofi wanajitokeza, wananiuliza mambo nisiyoyajua.

¹² Wananilipa mabaya kwa mazuri; nami pekee nimebaki ukiwa.

¹³ Lakini wao walipokuwa wagonjwa, mimi nilivaa magunia kuonyesha huzuni, nilijitesa kwa kufunga kula chakula. Niliomba nikikuwa nimeinamisha kichwa.

¹⁴ Nikakuwa kama ninamulilia rafiki au ndugu yangu. Nilikwenda huku na huko kwa huzuni, kama mutu anayeomboleza kifo cha mama yake.

¹⁵ Lakini mimi nilipoanguka, walikusanyika kunisimanga. Walikusanyika kuniuzi. Wageni nisiowajua walinizomea bila kukoma, wala hakuna aliyewazuia.

¹⁶ Walinichekelea, walinisagia meno.

¹⁷ Ee Yawe, utaangalia tu mpaka wakati gani? Uniokoe kutoka mashambulio yao; uokoe maisha yangu kutoka simba wakali hao.

¹⁸ Hivi nitakushukuru kati ya kusanyiko kubwa la watu; nitakutukuza kati ya kundi kubwa la watu.

¹⁹ Usiwaache waadui hao wabaya wanisimange, hao wanaonichukia bure, wafurahie mateso yangu.

²⁰ Hawasemi vizuri juu ya wengine, wanatunga tu uongo juu ya wanainchi watulivu.

²¹ Wananishitaki kwa sauti, wakisema: “Sawa! Sawa! Tumeona wenyewe uliyotenda!”

²² Lakini wewe Yawe unaona jambo hilo. Usinyamaze, ee Yawe, usikae mbali nami.

²³ Uinuke, ee Yawe, unitetee; ukuje, ee Mungu wangu, uangalie maneno yangu.

²⁴ Ee Yawe, Mungu wangu, unitetee, unitendee kulingana na haki yako. Usiwaache waadui zangu wanisimange.

²⁵ Usiwaache waseme: “Tumefanikiwa sawa tulivyotaka!” au waseme: “Tumemumaliza huyu!”

²⁶ Uwaache hao wanaofurahia hasara yangu, washindwe wote na kufezeheka. Hao wote wanaojiona bora kuliko mimi, wapate haya na kufezeheka.

²⁷ Lakini wanaotaka kuona kwamba sina kosa, wakuwe na furaha tele, waseme siku zote: “Yawe ni mukubwa! Anapendezwa na kumupatia mutumishi wake uheri.”

²⁸ Hivi nitatangaza haki yako; nitasema sifa zako muchana kutwa.