Zaburi 33 - BIBLIA Maandiko Matakatifu Kwa Watu Wote 2002

Mashairi ya kumusifu Mungu

¹ Mushangilie kwa sababu ya Yawe, enyi watu wa haki! Watu wa usawa ndio wanaostahili kumusifu Mungu.

² Mumusifu Yawe kwa zeze; mumwimbie kwa kinubi cha nyuzi kumi.

³ Mumwimbie wimbo mupya; mupige kinubi vizuri na kushangilia.

⁴ Neno la Yawe ni la usawa; na matendo yake yote ni ya kuaminika.

⁵ Yawe anapenda haki na sheria. Dunia imejaa wema wake.

⁶ Mbingu ziliumbwa kwa neno la Yawe, na vyote vinavyokuwa ndani yake kwa pumzi ya kinywa chake.

⁷ Alikusanya maji ya bahari kama katika chupa, akavifunga vilindi vya bahari ndani ya gala.

⁸ Dunia yote imwogope Yawe! Wakaaji wote wa dunia wamwabudu!

⁹ Maana alisema, na ulimwengu ukakuwa; alitoa amri, nao ukajitokeza.

¹⁰ Yawe anavunja mipango ya mataifa, na anabadilisha mawazo yao.

¹¹ Mipango ya Yawe inadumu milele; kusudi lake linadumu kwa vizazi vyote.

¹² Heri taifa ambalo Mungu wake ni Yawe; heri wale aliowachagua kuwa watu wake mwenyewe!

¹³ Yawe anaangalia chini kutoka mbinguni, na kuwaona wanadamu wote.

¹⁴ Kutoka kwenye kiti chake cha kifalme, anawaangalia wakaaji wote wa dunia.

¹⁵ Yeye anaunda mioyo ya watu wote, yeye anajua kila kitu wanachofanya.

¹⁶ Mufalme hawezi kuokolewa kwa kuwa na kundi kubwa; wala shujaa hapati ushindi kwa nguvu zake kubwa.

¹⁷ Farasi wa vita hafai kitu kwa kupata ushindi; nguvu zake nyingi haziwezi kumwokoa mutu.

¹⁸ Yawe anawaangalia wale wanaomwabudu, watu ambao wanatumainia wema wake.

¹⁹ Yeye anawaokoa katika kifo, anawalinda wakati wa njaa.

²⁰ Mioyo yetu inamutumainia Yawe. Yeye ni musaidizi wetu na ngao yetu.

²¹ Tunafurahi kwa sababu yake; tunatumainia jina lake takatifu.

²² Wema wako ukae nasi, ee Yawe, kwa maana tumekuwekea tumaini letu.