Zaburi 29 - BIBLIA Maandiko Matakatifu Kwa Watu Wote 2002

Sauti ya Mungu katika zoruba

¹ Zaburi ya Daudi. Mumupe Yawe heshima, enyi viumbe vya mbingu, museme kwamba Yawe ni mutukufu na mwenye nguvu.

² Museme kwamba jina la Yawe ni tukufu. Mumwabudu katika pahali pake patakatifu.

³ Sauti ya Yawe inasikilika juu ya maji; Mungu mutukufu anapiga radi, sauti ya Yawe inasikilika juu ya bahari!

⁴ Sauti ya Yawe ni yenye nguvu, sauti ya Yawe ni yenye mamlaka.

⁵ Sauti ya Yawe inavunja miti mikubwa ya mierezi; Yawe anavunja mierezi ya Lebanoni.

⁶ Anarusha milima ya Lebanoni kama mwana-ngombe, milima ya Hermoni kama mwana-mbogo.

⁷ Sauti ya Yawe inatokeza ndimi za moto.

⁸ Sauti ya Yawe inatetemesha jangwa, Yawe anatetemesha jangwa la Kadesi.

⁹ Sauti ya Yawe inatikisa mivule, inaongoa majani ya miti ya pori, na wote wanaokuwa katika hekalu lake wanasema: “Utukufu kwa Mungu!”

¹⁰ Yawe ameikaa juu ya mafuriko ya maji; Yawe ni mufalme anayetawala milele.

¹¹ Yawe awape watu wake nguvu! Yawe awabariki watu wake kwa amani!