Zaburi 25 - BIBLIA Maandiko Matakatifu Kwa Watu Wote 2002

Kumwomba Mungu uongozi na ulinzi

¹ Zaburi ya Daudi. Ee Yawe, ninakutolea moyo wangu.

² Ninakutumainia wewe, ee Mungu wangu, usiniache nifezeheke; waadui zangu wasifurahie kushindwa kwangu.

³ Usimwache anayekutumainia kupata haya; lakini wafezeheke wote wanaokuasi kwa makusudi.

⁴ Unijulishe njia zako, ee Yawe; unifundishe nifuate unayotaka.

⁵ Uniongoze katika ukweli wako na kunifundisha, kwa maana wewe ni Mungu, mwokozi wangu; ninakutegemea wewe kila siku.

⁶ Ee Yawe, ukumbuke rehema yako na wema wako ambazo ni za milele.

⁷ Usikumbuke zambi na makosa ya ujana wangu; unikumbuke kwa kadiri ya wema wako, kwa ajili ya uzuri wako, ee Yawe.

⁸ Yawe ni muzuri na wa usawa, kwa hiyo anawafundisha wakosaji njia.

⁹ Anawaongoza wanyenyekevu katika haki; anawafundisha njia yake.

¹⁰ Njia zote za Yawe ni njema na za uaminifu kwa wale wanaoshika agano lake na maagizo yake.

¹¹ Kwa ajili ya jina lako, ee Yawe, unisamehe kosa langu, kwa maana ni kubwa.

¹² Kila mutu anayemwabudu Yawe, Yawe atamufundisha njia ya kufuata.

¹³ Mutu wa namna hiyo atafanikiwa siku zote, na wazao wake watarizi inchi.

¹⁴ Yawe ni rafiki ya wale wanaomwabudu; yeye anawajulisha agano lake.

¹⁵ Ninainua macho kwa Yawe siku zote; yeye ataopoa miguu yangu kutoka mutego.

¹⁶ Unielekee, ee Mungu, unionee huruma, maana mimi ni pekee na zaifu.

¹⁷ Uniondolee mahangaiko ya moyo wangu; uniondoe katika mashaka yangu.

¹⁸ Uangalie mateso yangu na taabu yangu; unisamehe zambi zangu zote.

¹⁹ Angalia jinsi waadui zangu wanavyokuwa wengi; ona jinsi wanavyonichukia vikali.

²⁰ Uyalinde maisha yangu, uniokoe; ninakukimbilia wewe, usikubali nifezeheke.

²¹ Ukamilifu na usawa vinanikinga, maana ninakutumainia wewe.

²² Ee Mungu, uwaokoe watu wako, Israeli; uwaokoe kutoka taabu zao zote.