Zaburi 22 - BIBLIA Maandiko Matakatifu Kwa Watu Wote 2002

Kilio

¹ Kwa mukubwa wa waimbaji. Mutindo wa wimbo “Swala wa mapambazuko”.

² Mungu wangu, Mungu wangu, mbona umeniacha? Mbona uko mbali sana kwa kunisaidia, mbali na maneno ya kilio changu?

³ Ee Mungu wangu, ninakulilia muchana lakini haujibu; ninakulalamikia usiku, lakini sipumziki.

⁴ Hata hivyo, wewe ni mutakatifu; wewe unatawala na kusifiwa na Waisraeli.

⁵ Babu zetu walikutegemea; walikutegemea, nawe ukawaokoa.

⁶ Walikulilia wewe, wakaokolewa; walikutegemea, nao hawakufezeheka.

⁷ Lakini mimi ni mududu tu, wala si mutu; nimetukaniwa na kuzarauliwa na watu.

⁸ Wote wanaoniona wananichekelea; wananizomea na kutikisa vichwa vyao.

⁹ Wanasema: “Alimutegemea Yawe, basi, Mungu amuponyeshe! Kama Mungu anapendezwa naye, basi, amwokoe!”

¹⁰ Lakini wewe ndiwe uliyenitoa katika tumbo la mama yangu, uliniweka salama kwa kifua cha mama yangu.

¹¹ Nimekutegemea tangu kuzaliwa kwangu. Tangu nilipozaliwa, wewe umekuwa Mungu wangu.

¹² Usikae mbali nami, kwa maana taabu imekaribia; wala hakuna wa kunisaidia.

¹³ Waadui wengi wananizunguka kama ngombe dume; wamenisonga kama ngombe dume wanono wa Basani!

¹⁴ Wanafungua vinywa vyao kama simba, tayari kushambulia na kurarua.

¹⁵ Nimekwisha kama maji yaliyomwangika; mifupa yangu yote imeteguka; moyo wangu ni kama inta, unayeyuka ndani yangu.

¹⁶ Koo langu limekauka kama kigae; ulimi wangu unanata ndani ya kinywa changu. Wewe umenilaza pembeni ya kaburi.

¹⁷ Kundi la waovu limenizunguka; wananizunguka kama kundi la imbwa; wamenitoboa mikono na miguu.

¹⁸ Nimebaki mifupa mitupu; waadui zangu wananiangalia na kunisimanga.

¹⁹ Wanagawanya nguo zangu, na kuipigia kanzu yangu kura.

²⁰ Lakini wewe, ee Yawe, usikae mbali nami. Ukuwe musaada wangu, ukuje haraka kunisaidia.

²¹ Uokoe nafsi yangu toka upanga, uokoe maisha yangu toka mikono ya imbwa hao!

²² Uniokoe toka kinywa cha simba; uokoe nafsi yangu zaifu toka pembe za mbogo hao.

Wimbo wa shukrani

²³ Nitawaelezea wandugu zangu matendo yako; nitakusifu kati ya kusanyiko lao, nikisema:

²⁴ “Enyi munaomwabudu Yawe, mumusifu! Mumutukuze, enyi wazao wote wa Yakobo! Mumwogope Mungu, enyi wazao wote wa Israeli!

²⁵ Maana yeye hatupilii au kuzarau taabu ya muzaifu; wala hajifichi mbali naye, lakini anamusikiliza anapomwomba musaada.”

²⁶ Kwa sababu yako ninakusifu katika kusanyiko kubwa la watu; nitatimiza ahadi zangu mbele ya wanaomwabudu.

²⁷ Wamasikini watakula na kushiba; wanaomutafuta Yawe watamusifu. Mungu awajalie waishi milele!

²⁸ Ulimwengu wote utakumbuka na kumurudilia Yawe; jamaa zote za mataifa zitamwabudu.

²⁹ Maana Yawe ni mufalme; yeye anatawala mataifa.

³⁰ Wenye kiburi wote katika dunia watamwabudu; wote ambao ni wa kufa watainama mbele yake, wote ambao hawawezi kudumisha uzima wao.

³¹ Vizazi vyao vitamutumikia; watu wataelezea kizazi kinachokuja habari za Yawe,

³² watatangazia wale watakaozaliwa matendo yake ya wokovu. Watu wasiozaliwa bado wataambiwa: “Yawe ndiye aliyefanya hayo!”