Zaburi 21 - BIBLIA Maandiko Matakatifu Kwa Watu Wote 2002

Shukrani kwa ajili ya ushindi

¹ Kwa mukubwa wa waimbaji. Zaburi ya Daudi.

² Ee Yawe, mufalme anashangilia kwa nguvu yako, anafurahi sana kwa musaada uliomupa.

³ Umemutimizia mapenzi ya moyo wake; wala haukumukatalia ombi lake.

⁴ Umemufikia, ukamupatia baraka nzurinzuri; umemuvalisha taji ya zahabu safi juu ya kichwa chake.

⁵ Alikuomba maisha, nawe ukamupatia; ulimupatia siku nyingi milele na milele.

⁶ Kwa musaada wako, amepata utukufu sana; wewe umemujalia sifa na heshima.

⁷ Unamujalia baraka zako siku zote; unamufurahisha kwa sababu uko pamoja naye.

⁸ Mufalme anamutumainia Yawe; kwa wema wa Mungu Mukubwa atakuwa salama.

⁹ Mukono wako, ewe mufalme, utawakamata waadui zako wote; mukono wako wa nguvu utawakamata wanaokuchukia.

¹⁰ Utakapotokea utawaangamiza kama kwa moto wa furu. Yawe atawamaliza kwa hasira yake, moto utawateketeza kabisa.

¹¹ Utawaangamiza wazao wao watoweke katika dunia; watoto wao hawatabaki kati ya wanadamu.

¹² Hata kama wakifanya shauri baya juu yako, kama wakikamata mipango ya udanganyifu, hawataweza kitu hata kidogo.

¹³ Kwa maana wewe utapiga mishale mbele yao, utawakimbiza mbio.

¹⁴ Utukuzwe, ee Yawe, kwa sababu ya nguvu yako! Tutaimba na kusifu kwa ajili ya uwezo wako.