Zaburi 18 - BIBLIA Maandiko Matakatifu Kwa Watu Wote 2002

Kusifu Mungu juu ya ushindi

¹ Kwa mukubwa wa waimbaji. Zaburi ya Daudi, mutumishi wa Mungu, aliyomwimbia wakati alipomwokoa katika mikono ya Saulo na waadui wengine.

² Ninakupenda, ee Yawe, nguvu yangu!

³ Yawe ni kikingio changu, kimbilio langu, mukombozi wangu, Mungu wangu, yule ambaye ninamukimbilia, ngao yangu, nguvu ya wokovu wangu, munara wangu.

⁴ Ninamwita Yawe anayestahili sifa anisaidie, nami ninaokolewa kutoka waadui zangu.

⁵ Kamba za kifo zilinizunguka, mafuriko ya maangamizi yalinishambulia;

⁶ kamba za kuzimu zilinizunguka, mitego ya kifo ilikuwa mbele yangu.

⁷ Katika taabu yangu, nilimwita Yawe; nilimulilia Mungu wangu anisaidie. Toka katika hekalu lake, alisikia sauti yangu; kilio changu kilimufikia katika masikio yake.

⁸ Halafu dunia ikatetemeka na kutikisika, misingi ya milima ikayumbayumba na kutetemeka, kwa maana Mungu alikuwa amekasirika.

⁹ Moshi ulifuka kutoka katika pua lake, moto wenye kuteketeza ukatoka katika kinywa chake, makaa ya moto yakatokea.

¹⁰ Aliinamisha anga, akashuka chini, na wingu jeusi lilikuwa chini ya miguu yake.

¹¹ Alipanda juu ya kerubi na kuruka, akaruka juu ya mabawa ya upepo.

¹² Alijifunika giza pande zote, alijizungushia mawingu mazito ya mvua.

¹³ Umeme ulimetameta mbele yake; na katika mawingu kukatokea mvua ya mawe na makaa ya moto.

¹⁴ Yawe alinguruma kutoka mbingu; Mungu Mukubwa akatoa sauti yake.

¹⁵ Aliwapiga waadui mishale yake, akawatawanya; alirusha umeme mukali, akawakimbiza.

¹⁶ Ee Yawe, ulipovikaripia, pumzi ya pua yako ilifunua vilindi vya bahari na misingi ya dunia ikaonekana.

¹⁷ Mungu alinyoosha mukono wake kutoka juu, akanitwaa, alininyanyua kutoka ndani ya maji mengi.

¹⁸ Aliniokoa kutoka adui yangu mwenye nguvu, kutoka hao walionichukia na kuwa na nguvu kunishinda.

¹⁹ Walinishambulia nilipokuwa katika taabu, lakini Yawe alinikinga.

²⁰ Alinileta, akaniweka kwenye nafasi ya usalama; aliniponyesha kwa sababu alipendezwa nami.

²¹ Yawe alinitendea kwa kadiri ya haki yangu; alinilipa kwa vile mikono yangu haina kosa.

²² Maana nimefuata njia za Yawe, wala sikujitenga na Mungu wangu kwa ajili ya uovu.

²³ Nimeshika maagizo yake yote, sikuacha kufuata masharti yake.

²⁴ Mbele yake nilikuwa mukamilifu; nimejikinga nisikuwe na kosa.

²⁵ Yawe amenilipa kwa kadiri ya haki yangu; kwa kadiri ya usafi wa mikono yangu mbele yake.

²⁶ Wewe ni mwema kwa wema, mukamilifu kwa wakamilifu,

²⁷ bila kosa kwa wale ambao hawafanyi makosa, lakini mukali kwa waovu.

²⁸ Wewe unawaokoa wanyenyekevu, lakini unawashusha wenye macho ya kujivuna.

²⁹ Wewe, ee Yawe, unawakisha taa yangu. Mungu wangu anafanya giza langu likuwe mwangaza.

³⁰ Kwa musaada wako, ninashinda kundi la waaskari; kwa musaada wa Mungu wangu, ninaruka kuta.

³¹ Njia ya Mungu ni kamilifu. Ahadi ya Yawe ni ya kuaminika. Yeye ni ngao kwa wote wanaomukimbilia.

³² Nani anayekuwa Mungu isipokuwa Yawe? Nani anayekuwa kikingio isipokuwa Mungu wetu?

³³ Ni Mungu ambaye ananipatia nguvu, na kuifanya salama njia yangu.

³⁴ Ameiimarisha miguu yangu kama ya swala, na kunilinda salama juu ya milima.

³⁵ Ananifundisha kupigana vita, mikono yangu iweze kuvuta upinde wa chuma.

³⁶ Umenipa ngao yako ya wokovu na kuniimarisha kwa mukono wako wa kuume. Nimefanikiwa kwa sababu ulikubali kunisaidia.

³⁷ Umepanua njia yangu wala miguu yangu haikuteleza.

³⁸ Niliwafuata waadui zangu na kuwakamata; sikurudi nyuma mpaka wamemalizika.

³⁹ Niliwaangamiza, wasiweze kuinuka tena; walianguka chini ya miguu yangu.

⁴⁰ Wewe ulinijalia nguvu ya kupigana vita; uliwaporomosha waadui chini yangu.

⁴¹ Uliwakimbiza waadui zangu, na wale walionichukia niliwaangamiza.

⁴² Walitafuta musaada, lakini hakukukuwa wa kuwasaidia; walimulilia Yawe, lakini hakuwajibu.

⁴³ Niliwatwanga, wakakuwa kama vumbi inayopeperushwa na upepo; niliwakanyaga kama matope katika barabara.

⁴⁴ Wewe uliniokoa kutoka mashambulizi ya watu, ukanifanya kuwa mutawala wa mataifa. Watu nisiowajua walinitumikia.

⁴⁵ Waliposikia tu habari zangu, walinitii; wageni walinijia wakinyenyekea.

⁴⁶ Wageni walivunjika moyo; wakakuja kutoka makimbilio yao wakitetemeka.

⁴⁷ Yawe anaishi! Yeye ni kikingio changu – asifiwe! Mungu ni mwokozi wangu – atukuzwe!

⁴⁸ Yeye ameniwezesha kulipiza kisasi; na kuwaweka mataifa chini ya mamlaka yangu.

⁴⁹ Ameniokoa kutoka waadui zangu, Ee Yawe, ulinitukuza juu ya wapinzani wangu na kuniponyesha kutoka watesaji wakali.

⁵⁰ Kwa hiyo, nitakutukuza kati ya mataifa, nitaliimbia sifa jina lako.

⁵¹ Mungu anamujalia mufalme wake ushindi mukubwa; anamutendea mema muchaguliwa wake, ndiye Daudi na wazao wake milele.