Zaburi 17 - BIBLIA Maandiko Matakatifu Kwa Watu Wote 2002

Maombi ya mutu mwema

¹ Maombi ya Daudi. Ee Yawe, usikie ombi langu la haki, usikilize kilio changu, uyategee sikio maombi yangu yasiyokuwa ya udanganyifu.

² Haki yangu ikuje kutoka kwako, maana wewe unajua jambo la haki.

³ Wewe unajua kabisa moyo wangu; umenifikia usiku kunichunguza, umenitia katika majaribu; haukuona uovu ndani yangu, sikusema kitu kisichofaa.

⁴ Juu ya matendo watu wanayotenda, mimi nimetii amri yako, sikushika njia za watesaji wakali.

⁵ Nimefuata siku zote njia yako; wala sijatereza hata kidogo.

⁶ Ee Mungu, ninakuita, maana wewe unanijibu; unitegee sikio, uyasikie maneno yangu.

⁷ Onyesha wema wako wa ajabu; uwaokoe kutoka waadui zao wale wanaokimbilia kwako.

⁸ Unilinde kama mboni ya jicho lako; unifiche chini ya kivuli cha mabawa yako,

⁹ mbali na mashambulio ya waovu, mbali na waadui zangu wa hatari wanaonizunguka.

¹⁰ Hao hawana huruma yoyote ndani ya moyo; wamejaa maneno ya kujivuna.

¹¹ Wananifuatilia na kunizunguka; wananivizia waniangushe chini.

¹² Wako tayari kunirarua kama simba, kama simba mukali anavyovizia nyama.

¹³ Ee Yawe, simama sasa uwapiganishe na kuwaporomosha! Kwa upanga wako uokoe nafsi yangu kutoka waovu.

¹⁴ Ee Yawe, mukono wako uwafukuze kati ya watu, tukio lao likuwe kutengana na wanaokuwa wazima. Uwashibishe kwa akiba uliyowawekea, watoto wao nao washibe na kuacha sehemu, wawaachie hata na wajukuu wao.

¹⁵ Lakini mimi nitauona uso wako, maana mimi ni mutu wa haki; nitakapoamuka nitajaa furaha kwa sababu unanitokea.