Zaburi 145 - BIBLIA Maandiko Matakatifu Kwa Watu Wote 2002

Wimbo wa kumusifu Mungu

¹ Wimbo wa sifa wa Daudi. Nitakutukuza, ee Mungu wangu na mufalme wangu; nitalitukuza jina lako kwa milele na milele.

² Nitakutukuza kila siku; nitalisifu jina lako kwa milele na milele.

³ Yawe ni mukubwa, anastahili sifa nyingi; ukubwa wake hauwezi kuchunguzika.

⁴ Sifa za matendo yako zitaelezwa kwa kizazi hata kizazi, watu watatangaza matendo yako makubwa.

⁵ Nitasema juu ya utukufu na mamlaka yako, nitafikiri juu ya matendo yako ya ajabu.

⁶ Watu watatangaza ukubwa wa matendo yako ya ajabu, nami nitatangaza ukubwa wako.

⁷ Watatangaza sifa za uzuri wako mwingi, na kuimba juu ya haki yako.

⁸ Yawe ni mwenye huruma na rehema; yeye hakasiriki upesi, amejaa wema.

⁹ Yawe ni muzuri kwa wote, ni mwenye huruma kwa viumbe vyake vyote.

¹⁰ Viumbe vyako vyote vitakushukuru, ee Yawe, nao waaminifu wako watakutukuza.

¹¹ Watasema juu ya utukufu wa ufalme wako, na kutangaza juu ya nguvu yako kubwa,

¹² kusudi kila mutu ajue matendo yako makubwa, na mamlaka ya ufalme wako wenye utukufu.

¹³ Ufalme wako ni ufalme wa milele; mamlaka yako yanadumu vizazi vyote. Yawe ni mwaminifu katika ahadi zake zote, ni mwema katika matendo yake yote.

¹⁴ Yawe anawashikilia wote wanaoanguka; anawainua wote waliogandamizwa.

¹⁵ Viumbe vyote vinakutazamia, nawe unavipatia chakula chao kwa wakati wake.

¹⁶ Unafumbua mukono wako kwa moyo safi, unatimiza mahitaji ya kila kiumbe kinachoishi.

¹⁷ Yawe ni mwenye haki katika njia zake zote; ni mwema katika matendo yake yote.

¹⁸ Yawe yuko karibu na wote wanaomwomba, wote wale wanaomwomba kwa uaminifu.

¹⁹ Anajibia mahitaji yao wote wanaomwabudu; anasikia kilio chao na kuwaokoa.

²⁰ Yawe anawalinda wote wanaomupenda; lakini anawaangamiza waovu wote.

²¹ Nitatangaza sifa za Yawe; viumbe vyote vilisifu jina lake takatifu, kwa milele na milele.