Zaburi 144 - BIBLIA Maandiko Matakatifu Kwa Watu Wote 2002

Shukrani kwa ajili ya ushindi

¹ Zaburi ya Daudi. Atukuzwe Yawe, yeye ni: nguvu yangu, yule anayeizoeza mikono yangu kupigana vita na kuvifundisha vidole vyangu kugombana,

² rafiki yangu wa kweli, kimbilio langu, upango wangu, mukombozi wangu, ngao yangu, yule anayenilinda, yule anayeshinda mataifa na kuyaweka chini yangu.

³ Ee Yawe, mutu ni nini hata umujali? Mwanadamu ni nini hata ufikiri juu yake?

⁴ Mwanadamu ni kama pumzi tu; siku zake zinapita kama kivuli.

⁵ Uinamishe mbingu zako, ee Yawe, ushuke chini! Uiguse milima, nayo itoe moshi!

⁶ Upige umeme, uwasambaze waadui; upige mishale yako, uwakimbize!

⁷ Unyooshe mukono wako kutoka juu, uniopoe katika maji haya mengi, uniokoe kutoka makucha ya wageni

⁸ ambao wanasema maneno ya uongo na kunyoosha mukono kwa kushuhudia uongo.

⁹ Ee Mungu, nitakuimbia wimbo mupya; nitakupigia kinubi cha nyuzi kumi,

¹⁰ wewe unayewapa wafalme ushindi, unayemwokoa mutumishi wako Daudi!

¹¹ Uniokoe kutoka upanga wa waadui wakali, uniokoe kutoka makucha ya wageni, ambao wanasema maneno ya uongo, wanaonyoosha mukono kwa kushuhudia uongo.

¹² Katika ujana wao, wana wetu wakuwe kama mimea iliyostawi vizuri; nao wabinti wetu wakuwe wazuri kama nguzo zilizochongwa kwa kupamba nyumba ya kifalme.

¹³ Gala zetu zijae mavuno ya kila aina. Kondoo wetu katika mbuga wazae maelfu na maelfu.

¹⁴ Ngombe wetu wakuwe na afya na nguvu, kusitokwe mimba wala kukosa kuibeba. Kusikuwe tena kilio katika mitaa yetu.

¹⁵ Heri taifa ambalo limejaliwa hayo! Heri taifa ambalo Yawe ndiye Mungu wao!