Zaburi 142 - BIBLIA Maandiko Matakatifu Kwa Watu Wote 2002

Maombi ya mutu aliyeachwa pekee

¹ Mashairi ya Daudi alipokuwa ndani ya pango.

² Ninamulilia Yawe kwa sauti kubwa, ninamusihi Yawe kwa sauti kubwa.

³ Ninamutolea malalamiko yangu, ninamwelezea taabu zangu.

⁴ Roho yangu inaporegea kabisa, yeye yuko, anajua mwenendo wangu. Waadui wamenitegea mitego katika njia ninayopita.

⁵ Nikiangalia kwa kuume kwangu na kungojea, ninaona hakuna mutu wa kunisaidia; sina tena nafasi ya kukimbilia, hakuna mutu anayenijali.

⁶ Ninakulilia wewe, ee Yawe! Wewe ni kimbilio langu; wewe ni hitaji langu lote katika inchi ya wenye uzima.

⁷ Usikilize kilio changu, maana nimetabanika sana; uniokoe kutoka watesaji wangu, maana wamenizidi nguvu.

⁸ Uniondoe humu katika kifungo, kusudi nipate kukushukuru, nikijiunga na watu wa haki kwa sababu ya vyote ulivyonitendea.