Zaburi 141 - BIBLIA Maandiko Matakatifu Kwa Watu Wote 2002

Hatari za tamaa mbaya

¹ Kwa mukubwa wa waimbaji: Zaburi ya Daudi. Ninakulilia, ee Yawe, ukuje haraka kunisaidia! Usikilize sauti yangu wakati ninapokuita!

² Upokee maombi yangu kama ubani; ninapoinua mikono yangu kwako, unikubali kama sadaka ya magaribi.

³ Ee Yawe, ulinde kinywa changu, uweke mulinzi kwenye mulango wa kinywa changu.

⁴ Unikinge nisielekee kufanya mabaya, nisijishugulishe na matendo maovu, nisijiunge na watu wanaotenda mabaya, wala nisishiriki hata kidogo katika karamu zao.

⁵ Afazali mutu mwema anipige kwa kunionya; lakini sikubali hata kidogo kusifiwa na wabaya, maana ninaomba siku zote juu ya maovu yao.

⁶ Wakubwa wao watakapopondwa juu ya mawe, ndipo watatambua kwamba maneno yangu yalikuwa mazuri.

⁷ Mifupa yao itatawanywa kwenye midomo ya kuzimu kama kuni zilizopasuliwa vipandevipande!

⁸ Lakini mimi ninakutegemea, ee Yawe, Mungu wangu; ninakimbilia kwako, usiniache katika hatari.

⁹ Unikinge na mitego waliyonitegea, uniepushe na wavu wa hao watu waovu.

¹⁰ Waovu wanaswe katika mitego yao wenyewe, wakati mimi ninaponyoka.