Zaburi 138 - BIBLIA Maandiko Matakatifu Kwa Watu Wote 2002

Maombi ya shukrani

¹ Zaburi ya Daudi. Ninakushukuru, ee Yawe, kwa moyo wangu wote, ninaimba sifa zako mbele ya miungu.

² Ninainama uso mpaka chini kuelekea hekalu lako takatifu. Ninalisifu jina lako, kwa sababu ya wema na uaminifu wako. Umeheshimisha jina lako na neno lako kuliko vitu vyote.

³ Nilipokulilia, wewe ulinijibu; umeniongezea nguvu yangu.

⁴ Wafalme wote katika dunia watakusifu, ee Yawe, kwa sababu wameyasikia maneno yako.

⁵ Wataimba sifa za matendo yako, ee Yawe, kwa maana utukufu wako ni mukubwa.

⁶ Ee Yawe, ingawa wewe uko juu ya wote, unawaangalia wanyenyekevu kwa wema; lakini, unatambua wenye kiburi kwa mbali.

⁷ Hata nikisongwa na taabu, wewe unanilinda. Unanyoosha mukono wako juu ya waadui zangu wakali, kwa nguvu yako kubwa unaniokoa.

⁸ Ee Yawe, utatimiza yote uliyoniahidia. Wema wako, ee Yawe, unadumu milele. Usisahau kazi ya mukono wako mwenyewe.