Zaburi 135 - BIBLIA Maandiko Matakatifu Kwa Watu Wote 2002

Sifa kwa Mungu

¹ Haleluia! Musifu jina la Yawe, mumusifu, enyi watumishi wake.

² Mumusifu, enyi munaokaa katika nyumba yake, ndani ya viwanja vya nyumba ya Mungu wetu!

³ Mumusifu Yawe kwa sababu yeye ni muzuri; mumutukuze kwa nyimbo, maana inafaa.

⁴ Yawe amemuchagua Yakobo kuwa wake, watu wa Israeli kuwa mali yake mwenyewe.

⁵ Ninajua hakika kwamba Yawe ni mukubwa; Bwana wetu ni mukubwa kupita miungu yote.

⁶ Yawe anafanya chochote anachotaka, mbinguni, katika dunia, ndani ya bahari na shimo ndefu.

⁷ Analeta mawingu kutoka miisho ya dunia, anapiga umeme na kunyesha mvua, anavumisha upepo kutoka gala zake.

⁸ Aliwaua wazaliwa wa kwanza huko Misri, wazaliwa wa watu na wa nyama vilevile.

⁹ Alifanya miujiza na maajabu kwako, ee Misri, mufalme wa Misri na wakubwa wake wote.

¹⁰ Aliangamiza mataifa mengi, akawaua wafalme wenye nguvu

¹¹ kama vile Sihoni mufalme wa Waamori, Ogi mufalme wa Basani, na wafalme wote wa Kanana.

¹² Alikamata inchi zao kuwa urizi wa watu wake; zikuwe urizi wa watu wake Israeli.

¹³ Jina lako, ee Yawe, linadumu milele, utakumbukwa nyakati zote.

¹⁴ Yawe atawatetea watu wake; na kuwaonea huruma watumishi wake.

¹⁵ Miungu ya uongo ya mataifa ni feza na zahabu, imetengenezwa kwa mikono ya wanadamu.

¹⁶ Ina vinywa, lakini haisemi; ina macho, lakini haioni.

¹⁷ Ina masikio, lakini haisikii; wala haiwezi hata kuvuta pumzi.

¹⁸ Wote walioifanya wafanane nayo, kila mumoja anayeitegemea!

¹⁹ Enyi watu wa Israeli, mumutukuze Yawe! Enyi makuhani, mumutukuze Yawe!

²⁰ Enyi Walawi, mumutukuze Yawe! Enyi munaomwabudu Yawe, mumutukuze!

²¹ Atukuzwe Yawe katika Sayuni, atukuzwe katika makao yake Yerusalema. Haleluia!