Zaburi 132 - BIBLIA Maandiko Matakatifu Kwa Watu Wote 2002

Sifa ya nyumba ya Mungu

¹ Wimbo wa safari za kidini. Ee Yawe, umukumbuke Daudi, kumbuka taabu zote alizopata.

² Ukumbuke ahadi aliyokupa, ee Yawe, ndicho kiapo alichokuapia, ewe Mwenye Nguvu wa Yakobo. Alisema:

³ “Sitaingia ndani ya nyumba yangu, wala kulala ndani ya kitanda changu,

⁴ sitakubali kulala usingizi, wala kusinzia,

⁵ mpaka nikutayarishie wewe Yawe nafasi ya kukaa, ndiyo makao yako, ewe Mwenye Nguvu wa Yakobo!”

⁶ Tulisikia wakisema: “Sanduku la Agano ni kule Efurata, tulilikuta katika mashamba ya Yearimu.”

⁷ Basi! Tuende kwa nyumba ya Mungu, tuabudu mbele ya kiti chake cha kifalme!

⁸ Simama sasa, ee Yawe, ukuje kwenye pumziko lako, pamoja na Sanduku la Agano la uwezo wako!

⁹ Makuhani wako wakuwe watu wa haki siku zote; na waaminifu wako wapige vigelegele vya furaha!

¹⁰ Kwa ajili ya Daudi, mutumishi wako, usimukatae huyo mufalme uliyemuchagua.

¹¹ Yawe alimwapia Daudi kiapo cha hakika, kiapo hiki ambacho hatakivunja: “Nitamuweka mumoja wa wazao wako mwenyewe, kuwa mufalme nyuma yako.

¹² Watoto wako wakishika agano langu, na kufuata maagizo nitakayowapa, watoto wao pia watakuwa wafalme kama wewe milele.”

¹³ Yawe ameuchagua Sayuni, ametaka ukuwe makao yake.

¹⁴ Yeye anasema: “Hapa ndipo nitakapokaa milele, ndipo makao yangu, maana nimepachagua.

¹⁵ Nitaubariki Sayuni kwa mahitaji yake; nitawashibisha chakula wamasikini wake.

¹⁶ Nitawavalisha makuhani wake katika wokovu, waaminifu wake watapiga vigelegele vya furaha.

¹⁷ Humo nitamuchipukiza mufalme shujaa wa ukoo wa Daudi. Kama vile taa inayowaka, nitamwimarisha mufalme niliyemuchagua.

¹⁸ Waadui zake nitawavalisha haya; lakini yeye nitamuvalisha utukufu wa kifalme.”