Zaburi 12 - BIBLIA Maandiko Matakatifu Kwa Watu Wote 2002

Kuomba musaada

¹ Kwa mukubwa wa waimbaji. Kwa vyombo vyenye nyuzi nane. Zaburi ya Daudi.

² Unisaidie, ee Yawe! Watu wema wamekwisha; waaminifu wametoweka kati ya watu.

³ Kila mumoja anamudanganya mwenzake; anabembeleza lakini ni kwa moyo wa unafiki.

⁴ Ee Yawe, ukomeshe midomo hiyo ya kudanganya, na ndimi hizo zinazojigamba.

⁵ Wao wanasema: “Kwa ndimi zetu tutashinda; tuko na midomo, nani anayeweza kututawala?”

⁶ Lakini Yawe anasema: “Kwa sababu wamasikini wanaugua, na wakosefu wanalia, sasa ninasimama, nami nitawapa usalama wanaoutazamia.”

⁷ Ahadi za Yawe ni safi, safi kama feza iliyosafishwa katika chungu, kama feza iliyosafishwa mara saba.

⁸ Utulinde, ee Yawe, utukinge siku zote na kizazi hiki kiovu.

⁹ Waovu wanazunguka popote; upotovu unatukuzwa kati ya watu.