Zaburi 119 - BIBLIA Maandiko Matakatifu Kwa Watu Wote 2002

Sheria ya Mungu

¹ Heri watu wanaoishi katika ukamilifu, wanaofuata sheria ya Yawe.

² Heri wanaoshika maagizo yake, wanaomutafuta kwa moyo wao wote,

³ watu wasiotenda uovu hata kidogo, lakini wanafuata siku zote njia zake.

⁴ Ee Mungu, umetupatia kanuni zako kusudi tuzishike kwa uangalifu.

⁵ Heri mwenendo wangu ungeimarika kwa kuyafuata masharti yako!

⁶ Nikichunguza amri zako zote, hapo kweli sitapata haya.

⁷ Nitakusifu kwa moyo wenye kunyooka, nikijifunza maamuzi yako ya haki.

⁸ Nitafuata masharti yako; usiniache hata kidogo.

Kutii sheria ya Mungu

⁹ Namna gani kijana ataweza kujichunga katika njia safi? Ni kwa kufuatilia neno lako.

¹⁰ Ninakutafuta kwa moyo wote; usiniachilie kugeuka mbali na amri zako.

¹¹ Nimeshika neno lako ndani ya moyo wangu, kusudi nisikukosee.

¹² Utukuzwe, ee Yawe! Unifundishe masharti yako.

¹³ Nitarudiliarudilia kwa sauti maamuzi yako yote uliyotoa.

¹⁴ Ninafurahi kufuata maagizo yako, kuliko kuwa na utajiri mwingi.

¹⁵ Ninafikiri juu ya kanuni zako, na kuangalia njia zako.

¹⁶ Ninafurahia masharti yako; sitasahau neno lako.

Kufurahia sheria ya Mungu

¹⁷ Unitendee mimi mutumishi wako kwa wema, nipate kuishi na kushika neno lako.

¹⁸ Uyafungue macho yangu, nipate kuona maajabu ya sheria yako.

¹⁹ Mimi ni mugeni tu hapa katika dunia; usinifiche amri zako.

²⁰ Roho yangu inaugua kwa hamu kubwa ya kutaka kujua siku zote maamuzi yako.

²¹ Wewe unawakaripia wenye kiburi waliolaaniwa, ambao wanageuka mbali na amri zako.

²² Uniepushe na matusi na mazarau yao, maana ninafuata maagizo yako.

²³ Hata kama wakubwa wananifanyia shauri baya, mimi mutumishi wako nitafikiri juu ya masharti yako.

²⁴ Maagizo yako ndiyo furaha yangu; hayo ndio washauri wangu.

Kushika sheria ya Mungu

²⁵ Ninagaagaa chini ndani ya mavumbi; unirudishie uzima sawa ulivyoahidi.

²⁶ Nimeungama niliyotenda, nawe ukanijibu; unifundishe masharti yako.

²⁷ Unifundishe namna ya kushika kanuni zako, nami nitafikiri juu ya matendo yako ya ajabu.

²⁸ Ninalia kwa uchungu; unirudishie nguvu kama ulivyoahidi.

²⁹ Uniepushe na njia za upotovu; unifundishe kwa huruma sheria yako.

³⁰ Nimechagua njia ya uaminifu; nitafuatilia maamuzi yako.

³¹ Ninashikamana na maagizo yako, ee Yawe; usikubali nipatishwe haya!

³² Nitafuatilia amri zako, maana unanifungua akili zaidi.

Kuomba hekima

³³ Ee Yawe, unifundishe kutii masharti yako, nami nitayashika mpaka mwisho.

³⁴ Unieleweshe nipate kushika sheria yako, niifuate kwa moyo wangu wote.

³⁵ Uniongoze katika njia ya amri zako, maana humo ninapata furaha yangu.

³⁶ Uvute moyo wangu kufuata maagizo yako, na si kwa ajili ya kupata faida isiyofaa.

³⁷ Uniepushe nisifuate mambo ya ovyo; unionyeshe njia yako, unipe uzima.

³⁸ Unitimizie mimi mutumishi wako ahadi yako; ahadi unayowapa wale wanaokuheshimu.

³⁹ Uniepushe na matusi ninayoogopa; maana maamuzi yako ni mema.

⁴⁰ Ninatamani sana kutii kanuni zako; unirudishie uzima maana wewe ni wa haki.

⁴¹ Wema wako unifikie, ee Yawe; uniokoe kama ulivyoahidi.

⁴² Hapo nitaweza kuwajibu hao wanaonitukana, maana mimi ninatumainia neno lako.

⁴³ Unijalie kusema ukweli wako siku zote, maana ninatumainia maamuzi yako.

⁴⁴ Nitatii sheria yako siku zote, nitaishika milele na milele.

⁴⁵ Nitaishi katika uhuru kamili, maana ninashugulika na kanuni zako.

⁴⁶ Nitawatangazia wafalme maagizo yako, wala sitaona haya.

⁴⁷ Furaha yangu ni kuzitii amri zako, ambazo mimi ninazipenda.

⁴⁸ Ninaziheshimu na kuzipenda amri zako; nitafikiri juu ya masharti yako.

Kuaminia sheria ya Mungu

⁴⁹ Ukumbuke ahadi yako kwangu mimi mutumishi wako, ahadi ambayo imenipa matumaini.

⁵⁰ Hata katika taabu, inanituliza, maana ahadi yako inanipa uzima.

⁵¹ Wasiomujali Mungu wananizarau siku zote, lakini mimi sigeuki mbali na sheria yako.

⁵² Ninapokumbuka maamuzi yako ya tangu zamani, ninafarijika, ee Yawe.

⁵³ Ninashikwa na hasira kali, ninapoona waovu wakivunja sheria yako.

⁵⁴ Masharti yako yamekuwa wimbo wangu, nikikuwa huku kama mugeni.

⁵⁵ Usiku ninakukumbuka, ee Yawe, na kushika sheria yako.

⁵⁶ Hili ni pato langu, kwamba ninashika kanuni zako.

Heshima kwa sheria ya Mungu

⁵⁷ Wewe, ee Yawe, ndiwe hitaji langu lote; ninaahidi kushika maneno yako.

⁵⁸ Ninataka kukupendeza kwa moyo wangu wote; unionee huruma kama ulivyoahidi!

⁵⁹ Nimefikiri juu ya mwenendo wangu, na nimerudi nifuate maagizo yako.

⁶⁰ Bila kukawia ninafanya haraka kushika amri zako.

⁶¹ Waovu wametega mitego waninase, lakini mimi sisahau sheria yako.

⁶² Usiku kati ninaamuka kwa kukusifu, kwa sababu ya maamuzi yako ya haki.

⁶³ Mimi ni rafiki ya wote wanaokuheshimu, rafiki ya wanaoshika kanuni zako.

⁶⁴ Dunia imejaa wema wako, ee Yawe, unifundishe masharti yako.

Ukamilifu wa sheria ya Mungu

⁶⁵ Umenitendea vizuri mimi mutumishi wako, kama ulivyoahidi, ee Yawe.

⁶⁶ Unipe hekima na ufahamu, maana ninaaminia amri zako.

⁶⁷ Mbele sijateswa nilikuwa nimepotea, lakini sasa ninashika neno lako.

⁶⁸ Wewe ni muzuri na unatenda mazuri; unifundishe masharti yako.

⁶⁹ Wenye kiburi wanasema uongo juu yangu, lakini mimi ninashika kanuni zako kwa moyo wote.

⁷⁰ Mioyo yao inafungana sana, lakini mimi ninafurahia sheria yako.

⁷¹ Nimefaidika kutokana na taabu yangu, maana imeniwezesha kujifunza masharti yako.

⁷² Sheria uliyoweka ni bora kwangu, kuliko mali zote za dunia.

Ukamilifu wa sheria ya Mungu

⁷³ Kwa mikono yako wewe mwenyewe uliniumba; unijalie akili nijifunze amri zako.

⁷⁴ Wanaokuheshimu wataniona na kufurahi, maana tumaini langu liko katika neno lako.

⁷⁵ Ninajua kwamba maamuzi yako ni ya haki, ee Yawe, na kwamba umeniazibu maana wewe ni mwaminifu.

⁷⁶ Wema wako unifariji, kama ulivyoniahidi mimi mutumishi wako.

⁷⁷ Unionee rehema nipate kuishi, maana sheria yako ni furaha yangu.

⁷⁸ Wenye kiburi wafezeheke, maana wananisumbua na maneno ya uongo, lakini mimi nitafikiri juu ya kanuni zako.

⁷⁹ Wote wanaokuheshimu wakuje kwangu, wapate kujua maagizo yako.

⁸⁰ Moyo wangu ukuwe mukamilifu juu ya masharti yako, kusudi nisifezeheke.

Kuteswa

⁸¹ Ninachoka kwa kukungojea uniokoe; ninatumainia neno lako.

⁸² Macho yangu yanafifia nikingojea ulichoahidi. Ninauliza: “Utakuja wakati gani kunifariji?”

⁸³ Nimekunjamana kama mufuko wa ngozi katika moshi, hata hivyo sijasahau masharti yako.

⁸⁴ Mimi mutumishi wako nitavumilia mpaka wakati gani? Utawaazibu wakati gani wale wanaonitesa?

⁸⁵ Wenye kiburi wamenichimbia mashimo, watu ambao hawafuati sheria yako.

⁸⁶ Amri zako zote ni za kuaminiwa; watu wananitesa bila haki; unisaidie!

⁸⁷ Walifikia karibu ya kuniangamiza, lakini mimi sikuvunja kanuni zako.

⁸⁸ Kwa wema wako, unirudishie uzima, nipate kufuata maagizo uliyotangaza.

Sheria ya Mungu ni ya kutegemewa

⁸⁹ Neno lako, ee Yawe, linadumu milele; linasimama imara mbinguni.

⁹⁰ Uaminifu wako unadumu kwa vizazi vyote, umeweka dunia pahali pake, nayo inadumu.

⁹¹ Kwa amri yako viumbe vyote viko leo, maana vitu vyote ni chini ya mamlaka yako.

⁹² Kama sheria yako isingekuwa furaha yangu, ningalikwisha kuangamia kwa taabu zangu.

⁹³ Sitasahau hata kidogo kanuni zako, maana kwa njia yao unanirudishia uzima.

⁹⁴ Mimi ni wako, uniokoe, maana nimejitoa kushika kanuni zako.

⁹⁵ Waovu wananivizia wapate kuniua; lakini mimi ninafikiri juu ya maagizo yako.

⁹⁶ Nimetambua kwamba kila kitu kina mwisho, lakini amri yako haina mupaka.

Kupenda sheria ya Mungu

⁹⁷ Ninapenda sana sheria yako! Ninafikiri juu yake muchana kutwa!

⁹⁸ Amri yako iko nami siku zote, inanipa hekima kuliko waadui zangu.

⁹⁹ Ninaelewa kuliko walimu wangu wote, kwa sababu ninafikiri juu ya maagizo yako.

¹⁰⁰ Ninawapita wazee kwa akili yangu, kwa sababu ninashika kanuni zako.

¹⁰¹ Ninajizuiza kufuata njia mbaya, kusudi nipate kushika neno lako.

¹⁰² Sikugeuka mbali na maamuzi yako, maana wewe mwenyewe ulinifundisha.

¹⁰³ Maagizo yako ni matamu sana kwangu; ni matamu kuliko asali!

¹⁰⁴ Kwa kanuni zako ninapata hekima, kwa hiyo ninachukia kila mwenendo mubaya.

Sheria ya Mungu ni mwangaza

¹⁰⁵ Neno lako ni taa ya kuniongoza, na mwangaza katika njia yangu.

¹⁰⁶ Nimeapa na kuhakikisha kiapo changu, kwamba nitashika maamuzi yako ya haki.

¹⁰⁷ Ee Yawe, ninateseka sana; unirudishie uzima kama ulivyoahidi.

¹⁰⁸ Ee Yawe, upokee maombi yangu ya shukrani, na kunielezea maamuzi yako.

¹⁰⁹ Maisha yangu yako katika hatari siku zote, lakini sisahau sheria yako.

¹¹⁰ Waovu wamenitegea mitego, lakini sigeuki mbali na kanuni zako.

¹¹¹ Maagizo yako ni urizi mukubwa kwangu milele; hayo ni furaha ya moyo wangu.

¹¹² Nimekusudia kwa moyo wote kufuata masharti yako milele.

Usalama katika sheria ya Mungu

¹¹³ Ninachukia watu wanafiki, lakini ninapenda sheria yako.

¹¹⁴ Wewe ni ngao yangu, na kimbilio langu; ninaweka tumaini langu katika neno lako.

¹¹⁵ Muondoke kwangu, enyi waovu, kusudi nipate kushika amri za Mungu wangu.

¹¹⁶ Uniimarishe sawa ulivyoahidi, nami nitaishi; usikubali nifezeheke katika tumaini langu.

¹¹⁷ Unishike nipate kuwa salama, nikuwe siku zote musikilivu kwa masharti yako.

¹¹⁸ Unawakataa wote wanaogeuka mbali na masharti yako; mawazo yao maovu ni ya bure.

¹¹⁹ Unaona waovu wote kama vile takataka, kwa hiyo mimi ninapenda maagizo yako.

¹²⁰ Ninatetemeka kwa kukuogopa wewe; nimejaa hofu kwa sababu ya maamuzi yako.

Utii wa sheria ya Mungu

¹²¹ Nimefanya mambo mema na ya haki; usiniache katika makucha ya waadui zangu.

¹²² Uhakikishe kunisaidia mimi mutumishi wako; usikubali wenye kiburi wanitese.

¹²³ Macho yangu yanafifia nikingojea uniokoe, nikingojea utimize uliyoahidi.

¹²⁴ Unitendee mimi mutumishi wako kadiri ya wema wako, unifundishe masharti yako.

¹²⁵ Mimi ni mutumishi wako. Unipe akili nipate kujua maagizo yako.

¹²⁶ Ee Yawe, sasa ni wakati wa kutenda kitu, kwa maana watu wanavunja sheria yako.

¹²⁷ Kweli, ninapenda amri zako, kuliko hata zahabu safi kabisa.

¹²⁸ Kwa hiyo, ninafuata kanuni zako zote; ninachukia kila njia ya upotovu.

Hamu ya kutii sheria za Mungu

¹²⁹ Maagizo yako ni ya ajabu; kwa hiyo ninayashika kwa moyo wote.

¹³⁰ Maelezo ya mafundisho yako yanaleta mwangaza; yanawapa akili wajinga.

¹³¹ Ninafungua kinywa kwa hamu kubwa, maana ninatamani sana amri zako.

¹³² Unigeukie na kunionea huruma, kama unavyowatendea wanaokupenda.

¹³³ Uniimarishie hatua zangu kama ulivyoahidi; usikubali mimi nitawaliwe na uovu.

¹³⁴ Unikomboe kutoka mateso ya wanadamu, kusudi nipate kushika kanuni zako.

¹³⁵ Uniangazie uso wako kwa wema, unifundishe masharti yako.

¹³⁶ Macho yangu yanatiririka machozi kama muto, kwa sababu watu hawaishiki sheria yako.

Ukamilifu wa sheria ya Mungu

¹³⁷ Ee Yawe, wewe ni wa haki; na hukumu zako ni za usawa.

¹³⁸ Umetoa maagizo yako, kwa haki na uaminifu.

¹³⁹ Upendo wangu kwako unanifanya niwake hasira, maana waadui zangu hawajali maneno yako.

¹⁴⁰ Ahadi yako ni hakika kabisa, nami mutumishi wako ninaipenda.

¹⁴¹ Mimi ni mudogo na ninazarauliwa; hata hivyo sisahau kanuni zako.

¹⁴² Haki yako ni haki ya milele; sheria yako ni ya kweli.

¹⁴³ Taabu na huzuni vimenipata, lakini amri zako ndizo furaha yangu.

¹⁴⁴ Maagizo yako ni ya haki siku zote; unijalie akili nipate kuishi.

Kuomba usalama

¹⁴⁵ Ninakulilia kwa moyo wangu wote; unijibu, ee Yawe, nifuate masharti yako.

¹⁴⁶ Ninakulilia, uniokoe nipate kushika maagizo yako.

¹⁴⁷ Ninaamuka mbele ya mapambazuko na kukuomba musaada; ninaweka tumaini langu katika maneno yako.

¹⁴⁸ Ninakaa macho wazi usiku kucha, kusudi nifikiri juu ya ahadi zako.

¹⁴⁹ Kwa wema wako, ee Yawe, unisikilize; kwa haki yako, unirudishie uzima.

¹⁵⁰ Wale wanaonitesa vibaya wanakaribia, hao wako mbali kabisa na sheria yako.

¹⁵¹ Lakini wewe ni karibu nami, ee Yawe, na amri zako zote ni za kuaminiwa.

¹⁵² Tangu zamani, nimejifunza maagizo yako ambazo umeziweka hata zidumu milele.

Kuomba musaada

¹⁵³ Uangalie mateso yangu, uniokoe, kwa maana sikusahau sheria yako.

¹⁵⁴ Unitetee na kunikomboa; unirudishie uzima kama ulivyoahidi.

¹⁵⁵ Waovu hawataokolewa hata kidogo, maana hawajali juu ya masharti yako.

¹⁵⁶ Rehema yako ni kubwa, ee Yawe, unirudishie uzima kama ulivyoahidi.

¹⁵⁷ Waadui na watesaji wangu ni wengi, lakini mimi sigeuki mbali na maagizo yako.

¹⁵⁸ Ninapowaona waasi hao ninachukizwa sana, kwa sababu hawashiki amri zako.

¹⁵⁹ Angalia, ee Mungu, ninavyopenda kanuni zako! Unirudishie uzima kadiri ya wema wako.

¹⁶⁰ Kifungo cha neno lako ni ukweli, maamuzi yako yote ya haki yanadumu milele.

¹⁶¹ Wakubwa wananitesa bila sababu, lakini mimi ninaheshimu maneno yako kwa moyo wote.

¹⁶² Ninafurahi kwa sababu ya neno lako, kama mutu aliyekuta kitu cha bei kali.

¹⁶³ Ninachukia kabisa uongo, lakini ninapenda sheria yako.

¹⁶⁴ Ninakusifu mara saba kila siku, kwa sababu ya maamuzi yako ya haki.

¹⁶⁵ Wanaopenda sheria yako wana amani kubwa; hakuna kinachoweza kuwaangusha.

¹⁶⁶ Ee Yawe, ninakungojea uniokoe; mimi ninatimiza amri zako.

¹⁶⁷ Ninashika maagizo yako; ninayapenda kwa moyo wote.

¹⁶⁸ Ninashika kanuni na maagizo zako; wewe unaona mwenendo wangu wote.

Kuomba musaada

¹⁶⁹ Kilio changu kikufikie, ee Yawe! Unijalie akili kama ulivyoahidi.

¹⁷⁰ Ombi langu likufikie; uniokoe kama ulivyoahidi.

¹⁷¹ Midomo yangu itatangaza sifa zako, maana unanifundisha masharti yako.

¹⁷² Nitaimba juu ya neno lako, maana amri zako zote ni za haki.

¹⁷³ Ukuwe siku zote tayari kunisaidia, maana nimeamua kufuata kanuni zako.

¹⁷⁴ Ninatamani sana uniokoe, ee Yawe; sheria yako ndiyo furaha yangu.

¹⁷⁵ Unijalie kuishi nipate kukusifu; na maamuzi yako yanisaidie.

¹⁷⁶ Ninatangatanga kama kondoo aliyepotea; ukuje kunitafuta mimi mutumishi wako, maana sikusahau amri zako.