Zaburi 118 - BIBLIA Maandiko Matakatifu Kwa Watu Wote 2002

Maombi ya shukrani

¹ Mumushukuru Yawe, kwa sababu ni muzuri! Wema wake unadumu milele!

² Watu wa Israeli waseme: “Wema wake unadumu milele.”

³ Wazao wa Haruni waseme: “Wema wake unadumu milele.”

⁴ Wote wanaomwabudu Yawe waseme: “Wema wake unadumu milele.”

⁵ Katika taabu yangu nilimwomba Yawe, naye akanisikia na kuniweka huru.

⁶ Yawe yuko nami, siogopi kitu; mwanadamu ataweza kunifanya nini?

⁷ Yawe yuko nami kwa kunisaidia; nami nitawaona waadui zangu wameshindwa.

⁸ Afazali kumukimbilia Yawe kuliko kumutumainia mwanadamu.

⁹ Afazali kumukimbilia Yawe, kuliko kuwatumainia waongozi wa dunia.

¹⁰ Mataifa yote yalinizunguka, lakini kwa jina la Yawe nikayaangamiza!

¹¹ Yalinizunguka kila upande, lakini kwa jina la Yawe, nikayaangamiza!

¹² Yalinizunguka, mengi kama nyuki, lakini yakateketea kama kichaka ndani ya moto; kwa jina la Yawe niliyaangamiza!

¹³ Nilishambuliwa sana karibu nishindwe, lakini Yawe alinisaidia.

¹⁴ Yawe ni nguvu yangu kubwa; yeye mwenyewe ndiye wokovu wangu.

¹⁵ Sauti za furaha ya ushindi zikasikilika katika hema za watu wa haki: “Mukono wa Yawe umetenda mambo makubwa!

¹⁶ Mukono wa nguvu wa Yawe umeleta ushindi! Mukono wa Yawe umetenda mambo makubwa!”

¹⁷ Sitakufa. Nitaishi na kueleza matendo ya Yawe.

¹⁸ Yawe ameniazibu sana, lakini hakuniachilia nikufe.

¹⁹ Munifungulie milango ya watu wa haki, niingie na kumushukuru Yawe!

²⁰ Huu ndio mulango wa Yawe, watu wa haki watapitia humo.

²¹ Ninakushukuru, ee Yawe, kwa kunijibu; kwa sababu wewe ni wokovu wangu.

²² Jiwe lililokataliwa na wajengaji, limekuwa sasa jiwe kubwa la musingi.

²³ Ni Yawe aliyefanya jambo hili, nalo ni ajabu sana kwetu.

²⁴ Hii ndiyo siku aliyoifanya Yawe; tushangilie na kufurahi.

²⁵ Tafazali utuokoe, ee Yawe! Tafazali utubariki, ee Yawe!

²⁶ Abarikiwe huyu anayekuja kwa jina la Yawe! Tunawabariki kutoka katika nyumba ya Yawe.

²⁷ Yawe ni Mungu; yeye ametujalia mwangaza wake. Mushike matawi katika mikono, mukiandamana mpaka kwenye mazabahu.

²⁸ Wewe ni Mungu wangu, ninakushukuru; ninakutukuza, ee Mungu wangu.

²⁹ Mumushukuru Yawe kwa sababu ni muzuri, kwa maana wema wake unadumu milele.