Zaburi 109 - BIBLIA Maandiko Matakatifu Kwa Watu Wote 2002

Malalamiko ya mutu anayekuwa katika taabu

¹ Kwa mukubwa wa waimbaji. Wimbo wa Daudi. Usinyamaze, ee Mungu, ninayekusifu!

² Watu waovu na wadanganyifu wananishambulia, wanasema uongo juu yangu.

³ Wanasema maovu juu yangu, na kunishambulia bila sababu.

⁴ Ingawa niliwapenda, walinishitaki. Hata hivyo, niliwaombea.

⁵ Wananilipa mabaya kwa mazuri yangu, na chuki kwa mapendo yangu.

⁶ Umuweke mwamuzi mubaya juu ya adui yangu; na anayemushitaki amupeleke mbele ya baraza.

⁷ Anapohukumiwa apatikane na kosa; malalamiko yake yahesabiwe kuwa kosa lingine.

⁸ Siku za maisha yake zikuwe chache, mutu mwingine akamate kazi yake!

⁹ Watoto wake wakuwe wayatima, na muke wake akuwe mujane!

¹⁰ Watoto wake watangetange na kuombaomba; wafukuzwe katika mabaki ya nyumba zao!

¹¹ Anayemudai kitu amunyanganye mali yake yote, na wageni wakule mapato ya jasho lake!

¹² Kusikuwe mutu wa kumutendea mema, au kuwatunza watoto wake wayatima!

¹³ Wazao wake wote wakufe; jina lake lisahauliwe katika kizazi kinachokuja!

¹⁴ Yawe akumbuke uovu wa babu zake, zambi za mama yake zisifutwe hata kidogo!

¹⁵ Yawe akumbuke zambi zao siku zote; lakini wao wenyewe wasahauliwe katika dunia.

¹⁶ Mwovu huyo hajali kabisa kutenda mema, lakini anatesa wamasikini, wakosefu, na wenye moyo wenye kuvunjika mpaka kufa.

¹⁷ Yeye alipenda kulaani watu; laana imupate yeye mwenyewe. Hakuwatakia wengine baraka; basi, asipate baraka yeye mwenyewe.

¹⁸ Kwake kulaani ni kama kuvaa nguo; basi, laana hizo zimulowanishe kama maji, zimwingie katika mifupa yake kama mafuta.

¹⁹ Laana zimufunike kama nguo, zimuzunguke siku zote kama mukaba.

²⁰ Yawe awalipe hayo hao watu wanaonishitaki, hao wanaosema mabaya juu yangu.

²¹ Lakini, ee Yawe, Bwana wangu, unitendee kwa heshima ya jina lako. Wema wako ni muzuri. Basi, uniokoe!

²² Mimi ni masikini na mukosefu; ninaumizwa mpaka ndani ya moyo wangu.

²³ Ninatoweka kama kivuli cha magaribi; nimepeperushwa kama nzige.

²⁴ Magoti yangu yanaregea kwa ajili ya kufunga kula chakula; nimebaki mifupa na ngozi.

²⁵ Watu wananichekelea; wanaponiona wanatikisa vichwa vyao kwa kunizarau.

²⁶ Unisaidie, ee Yawe, Mungu wangu; uniokoe kufuatana na wema wako.

²⁷ Uwaonyeshe watu kuwa wewe ndiwe uliyetenda hayo. Wewe, ee Yawe, ndiwe uliyefanya hivyo.

²⁸ Uwaache walaani, lakini wewe unibariki; wanaonishambulia wafezeheke, nami mutumishi wako nifurahi.

²⁹ Waadui zangu wazungukwe na mazarau; wajifunike haya yao kama vile nguo.

³⁰ Nitamushukuru sana Yawe kwa sauti; nitamusifu kati ya kundi kubwa la watu,

³¹ kwa maana yeye anamutetea mukosefu, kwa kumwokoa kutoka kwa wale wanaomuhukumu kufa.