Zaburi 108 - BIBLIA Maandiko Matakatifu Kwa Watu Wote 2002

Maombi ya kujikinga na waadui

¹ Zaburi ya Daudi: Wimbo.

² Moyo wangu ni tayari, ee Mungu. Moyo wangu ni tayari. Nitaimba na kukushangilia! Amuka, ee nafsi yangu!

³ Muamuke, enyi kinubi na zeze! Nitaamusha mapambazuko!

⁴ Ee Yawe, nitakushukuru kati ya mataifa; nitakuimbia sifa kati ya mataifa.

⁵ Wema wako ni mukubwa kuliko mbingu; uaminifu wako unaenea hata kwenye mawingu.

⁶ Utukuzwe, ee Mungu, juu ya mbingu! Utukufu wako uenee katika dunia yote!

⁷ Ukomboe watu hao unaowapenda; utusaidie kwa mukono wako na kutusikiliza.

⁸ Mungu amesema toka hekalu lake takatifu: “Sasa nitakwenda kwa shangwe kugawanya Sekemu, bonde la Sukoti nitalipima sehemu sehemu.

⁹ Gileadi ni yangu na Manase ni yangu; Efuraimu ni kofia yangu ya chuma, na Yuda ni fimbo yangu ya kifalme.

¹⁰ Moabu ni kama bakuli langu la kunawia; nitatupia kiatu changu katika Edomu kwa kuirizi, nitapiga kelele la ushindi juu ya Wafilistini!”

¹¹ Ni nani atakayenipeleka katika muji unaozungukwa na kuta? Ni nani atakayeniongoza mpaka Edomu?

¹² Ee Mungu, umetuacha kabisa? Wewe hauendi tena na makundi yetu ya waaskari!

¹³ Utupatie musaada juu ya waadui zetu, maana musaada wa mwanadamu haufai kitu.

¹⁴ Mungu akikuwa upande wetu, tutashinda. Yeye ndiye atakayewaponda waadui zetu.